Asiibi, ɩjikpaka kaŋɔrɔ kʊshilé ganaana kʊja, gaja 2025 na gɩ ce Ʊlampǝl kʊwalʊ. Gɩ ta atɩya gajaka bʊkɔŋkɔŋɔ̀ cɩɩnɩ naa atɩ kpa ŋkǝŋ gajaka gaɖe ma, mpá nɖe n ɖʊr aboŋo. Gaɖu gaɖe ga tɩ faŋa kpaarɩ wàà, jɩŋgaarɩ ɖǝn a ɖa mpá nɩ.
Gɩ tɩ́ kpa ʊwalʊ nɩ ma, ʊwalʊ kaaɖu gaɖe ga cǝm, abɔɖɔ gɩshɛbʊ. Aboí ɩsǝka ɩ yɔgɔ ashee samaa, ɩruufa gboo ba yɔgɔ, baa aŋa a ŋǝ gaɖu ʊnyǝŋkrǝ nɩ.
Ba sǝba bʊwalʊ ɖe gɩshɛbʊ, anyiŋǝ ashee Ʊlampǝl kampá, asala samaa aŋunii mpá nɩ na bɛrɛɩ na ɖoo na bʊɖufɔlɩ ace ŋkǝŋ ma. Kaŋkǝm ba sǝba gʊcǝrá gɩshɛbʊ, akulo ɩɖǝnɖǝn ɩ ɖoo acǝr, arɩ acǝma.
Acǝrá asʊ̀rá asʊ̀rá nɩ akulo tuutuuma ɩ ɖoo na ma kʊshilé ɖe, halɩ kɩɖǝn ɩ pɩ atɩ na ta bɛrɛ laŋ. Gɩcɩɩca gɩ ta pra cukucùkù, gaɖu ga ta cǝpra asǝu ntuli. Ɩsɔja manja kǝ ba kɔɔ tɩ sǝra ba lee gaɖǝn na. Gɩcɩɩca kafɔɩfɔɩ ɖe ɩ pra ma, ɩ pala samaa a nyantra aram atǝn. Kǝ ba kɔɔ tɩ sǝra atǝwǝ bʊwalʊ halɩ gakɔŋkɔŋɔ̀ ŋgaɖee ga cee sim ba râŋa ma na.
Ɖaa ba cee nyaʊ bʊwalʊ kabaamaakɔ ma, aleu ɖǝn ɩ ɖa kǝ ba kɔɔ tɩ́ lee na, bʊlei bʊɖǝn bʊ ɖa kǝ ba kɔɔ tɩ́ lǝ na, anii kaŋkulo gboo kɩ n kɔɔ tɩ́ sǝra aɖoo alǝ gaɖǝn na. Ama, gɩ lee koŋkaarɩ awala bɛrɛ ʊpampaŋa afaŋa pɩ atabɔ, atʊr na pɩ anii kɩɩbii n’akɔ́lɩ. Baɖǝn ba shɩ bʊkɔ́ɩ ba sǝra ma.
