Mbʊpá « Gɩ tʊ̂r na Nawaalɩyatu na Matiinu » n ɖa ɖa ashee basukurupi mbaɖee ba nǝ ba naa cêrecere atɩgɩkrǝ anii kʊŋɔn na kʊtʊr ɩsukuru bajala nɩ ma. Mbʊpá nɖe n tɩ lee bapi banyɩʊ baɖǝn bɩfaawɩɩ. Bani pɩ gǝŋ, Nawaalɩyatu na Matiinu.
Mbʊpá nɖe n wʊɖa ʊceru akoo-n’ɩnʊn. Ʊceru baa ʊpaŋa nɩ, Nawaalɩyatu na Matiinu bafaawɩɩ a ɖa ka ncǝn, ɩɖe lee bʊkɔ́ɩ bʊ shɩ lee bapi bajala babaamaakɔ nɩ ma, kɩfaawɩɩ. Nawaalɩyatu na Matiinu ba lee bʊja tǝtǝb kǝbapi pɩ, naa ajɩ gʊsoro aɖa sukuru kaŋku nɖɔŋkɔnɔ nɩ.
Ʊceru kambʊpá nɖe nɩ, ʊpi baa apaŋa a taa sǝ̂ra acerecere anii kagɩkrǝ kɩɩbii baŋunii ayɔ kʊŋɔn na kʊtʊr.
Anii kaŋkulo n laa ka mbʊpá nɖe n kâŋa n’anii kǝbapi ba yɔ̂ bagɩkrǝ kʊŋɔn na kʊtʊr. Baŋɔnka UMOORU Alijannatu n’ISIFU Rahinatu, afotolaaja FAFANA Mumuni.
Mbʊpá nɖe njɩ gɩ na cere na bapi ɩsukuru bajala nɩ gakoloŋ.
Anii kʊpi nɖee ayar n’anar ba sɔlɔ wàà, a cêrecere agɩkrǝ ma, a sim awʊɖa mbʊpá nɖe. N tɩ n kâŋa na nɩ ‘ʊceruceru nɩ were awu arɛ̀ɩ k’a wʊɖa na ma. Kagʊyá kʊ gǝŋ, ɩɖalɩsɔɔkulumi (700 F).
