Alaamɩshɩ gajaka jɩ Mɛɛrii katǝnleeja ɖǝn a pɩ atǝgatǝnleeɖu naa alǝ atɩga wàà, ba tɩ yɛɛ ba ɖʊ̂ ɩfǝtǝla babʊmbɔnɔ ashee atʊ. Ɩɖe tɩ lee ʊshilé ʊboŋoka nɖee ba na yɛɛ ba bôŋo ɩfǝtǝla baɖe kʊɖʊʊ ma. Ɩfǝtǝla kayo nɖee laŋ ɩ sim ba ɖʊ̂ ɩfǝtǝla baɖe ashee atʊ ma, atayo kɩla ɩɖǝn ɩ kǝl afǝtǝlyo ɖe. N’atǝnleeja ɖe a lǝ atɩnɖiyar wàà, maa gɩ ta sǝ̂ra asɩr àyó ɖe alaamɩshɩ ɖe, ba tǝ ba ɖʊ̂ ɩfǝtǝla ashee atʊ.
Baŋono ba lǝ wàà, « aleheeri ka na tûlo arɛ̀ naa a bǝ̂ɖa na ganyɩkǝma na » ma, na gɩ ŋantɩ ɖoo n’atayɔkɔ nɖee gɩ na tǝɖǝ n’àyó ma, asǝba ntǝma nɖe kpaarɩ.
Gɩ ɖa àyó ɩsɩrka ɖe nɩ na, ka gɩ kana aboŋo na, na ba toŋo ɩfǝtǝla baɖe akpa na ma. Na gɩ tǝɖǝ àyó kɩla nɖee ɩ kǝl fǝtǝla kayo ma, ɩŋunii asaa gaɖu ga ɖa fɛɛ.
Gɩ boŋo kpaarɩ ma, na ba tɔɔ pɩ aɖʊ. Ɩ lee ʊciŋkǝrka ashee atʊ ɖaa Mɛɛrii a lige atalaŋ ma. Gɩ tɩ nyiŋǝ pɩ acǝŋǝ wàà, ba naa lîge atalaŋ n’ayɔkɔsʊra ɩfɔlɩ nɖee ɩ nɩɩ kɔ̂ɔ pɩ ma.
Ɖaa ba ɖʊ ɩfǝtǝla baɖe ma, ba mana cam cam kpaarɩ gɩshilikɔnɔ gɩɖe.
Kagɩjibɔŋɔ ʊ ta kpâ atǝgatǝnleeɖu kaakukonu, ʊ naa yɔ̂ yɔ wàà, gɩshilikɔnɔ jɩ, ashee ɩfǝtǝla ba na kiɖe ma laŋ.
Gɩ sala bɛrɛ mbaɖee ba lee koŋkaarɩ ɖe ashee atʊ ma, na Mɛɛrii kǝbatǝnleeja baŋunii.
