Ɖaa gɩ cam atǝbʊmaŋkǝli kǝbakiɖeja gɩsaná ma

Mpá baa mpaŋa n laa bɛrɛ banyɩʊ pɩ ashee babʊmaŋkǝli kʊkiɖu.

Ʊshiléɩ gɩ wa na pɩ ma, ɩɖe tɩ lee afɔnɔ ‘aŋɔrɔ asǝbaka ‘ʊboŋu ni halɩ anyɩʊtaja ‘ɩshilé ɩnyɩʊ. Naa gɩ ye wa na pɩ, atɩga ba yʊga ɩshilé ɖe nɩ akpala ɩriu. Mpá baa mpaŋa na kʊshilé. Ʊshiléɩ gɩ wa na apá ɩsǝbaka ma, gɩ lee na pɩ na ntǝma tɔɔ na gajaka bʊkɔŋkɔŋɔ cɩɩnɩ halɩ gaɖǝn gɩshilikɔnɔ. Ntǝmaɩ gɩ lee na pɩ ma na gǝŋ : abʊpa kʊtʊr, ʊŋɔn n’atɩgɩkrǝ anii, naa ayeeyee na pɩ atǝgatǝnleeɖu kaku nɩ na faŋa pɩ ɖaa atɩntǝma n na sara ma. Gɩ boŋo ma, na ba kǝ akɔlɩ ashee atʊ gɩ cam aŋɔn atayofotala laŋ. Kaŋkǝm na atɩga ba ye shee pɩ ɩraaɖiyoo mbaɖee nɩ gɩ ɖʊ atabʊpa kabʊsaʊ ɩtʊrka ma, ba ce atɩ na kaŋa na bawor na cere cere n’ʊtʊr bʊmaŋkǝli bʊɖe kabʊmana. Gɩ boŋo ma, na gɩ ye ce atɩ jɩ ʊjɩʊ naa akɔɔ pɩ atɩ tǝwǝ ntǝma tɔɔ na bʊkɔŋkɔŋɔ bʊriu halɩ bʊkolom gɩteŋshile. Naa ba ye shɛ̂ʊ, ɩga ba shee pɩ ɩtanɩ nɖee ba jɩ apɩ ma, na nɖee ba jɩ̂ ashɛʊ ma. Na ba ye kɔɔ bapá nɩ. Ʊshilé ʊnyɩʊtaja kagʊsʊra, ʊriutaja gboo kagʊsʊra.

ʊtʊr gamaŋkǝli laŋ
ʊtʊr gamaŋkǝli laŋ

Laisser un commentaire