GʊGʊ ganaana kaja a ɖoo

AtaGʊGʊ ɖe a tɔɔ tam naa aye ɖoo. GʊGʊ kaŋkulo n lee koŋkaarɩ ashee abɔ ɖe. Ɩ shee saa ɖaa gɩ lêe naa ɩ ɖôo mbʊpá ma. Na gɩ saa aɖi baja bʊkpaʊ. Ɩ pala ka na GʊGʊ ɖe k’a kɔɔ tɩ́ ɖoo gaja ŋgaɖee ga fǝl wáá ma na. Bʊkpaʊ nɩ, na ba kaŋa na ŋkulo awalawala abɔ ɖe ɩ pra mbʊpá.

Ɩɖe tɩ lee GʊGʊ nɔmba ganaana kaja na gǝŋ. Na gɩ lee koŋkaarɩ apara abʊsaʊ ɖe n’atǝbʊmaŋkǝli Bashɩɖɩ ʊpacine nɩ. Basana ba kpa ashee ʊwalʊ ma, baɖe ba tɩ tʊr na ŋǝ wàà, atɩgɩkrǝ gɩ tɩ ce ŋyɩɩ. Gɩ sǝba abʊsaʊ ɖe kʊparʊ ma, ɩɖe tɩ lee afɔnɔ ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩnan kʊja, gaja kotoku-banyɩʊ-na tǝb-n’ɩnʊn.

Atǝgamaŋkǝli ŋgaɖee ga ɖa Ajegulɛ ma, ŋkǝŋ na gɩ sǝba GʊGʊ afɔlɩ kʊparʊ.
Atǝgamaŋkǝli ŋgaɖee ga ɖa Ajegulɛ ma, ŋkǝŋ na gɩ sǝba GʊGʊ afɔlɩ kʊparʊ.

GʊGʊ kaŋkulo n tɩ tʊr abʊsaʊ ɖe na ɖʊ kaasɛɛtɩ nɩ. Gɩ ta bôŋo naa gɩ ye para abʊsaʊ ɖe bʊpapiri nɩ, gaja gafɔlɩ ŋgaɖe kaŋɔrɔ asǝbaka nɖe nɩ. GʊGʊ 08

GʊGʊ kambʊsaʊ nsǝbaka nɩ, gɩ taba ataya Alaaji Sarabaa ɖaa a bʊŋa na lee na ɖoo na ɖooɖooɖo kabɔ ba na yɩɖa wàà, “Yɔ̂ naa aɖa” ma. Ɖaa bʊja akoo ma, kafaawɩɩ na gɩ lee n’ataya Sarabaa gʊbɔ gʊɖe nɩ. Bɛrɛɩ ba na yɛɛ ba tʊr “Yɔ̂ naa aɖa” abʊsaʊ ɩŋono ɛntɛrnɛɛtɩ nɩ ma, ba tǝ ba sǝ̂ra apǝkɩl atɩya : Yɔ̂ naa aɖa

Aŋɔnka : BABA BƆƉƖ Rafɩyatu

Laisser un commentaire