Anii kǝbayarɩ bʊwalʊ

Gʊcɩncaŋa kʊtinu
Gʊcɩncaŋa kʊtinu

Yofo ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩnan kʊja, gaja kotoku banyɩʊ-na-tǝb-n’ɩnan, ʊ lee ʊshilé ʊbʊmbɔnɔ ɖǝn na ashee anii kǝbayarɩ Togoo na Benɛɛ. Bayarɩ baɖe baŋunii kpataa Bashɩɖɩ ʊpacine nɩ na ba wala bʊwalʊ ŋkpala kulumi kanja. Gʊyà ACIIBAA anyɩʊtaja gʊsǝɖɩyarɩ a lee ka banɖiyar.

Bashɩɖɩ kasukuru ajala gɩcɩɩca gɩ na yɩɖa na gɩfɔnɔ wàà [centre] ma, nɩ na ba lee ʊwalʊ ɖe. Naa ba ye ɖoo ʊwalʊ kaaɖu, ba ce ce atɩ tine gʊyà ACIIBAA agʊcɩncaŋa gʊfɔlɩ ba cǝ gayarɩfala nɩ ma. Gacɩncaŋkonu ŋkǝŋ, bayarɩ baŋunii, basana mbaɖee kǝ ba lee bayarɩ na ma, bayoforɛ, baŋono mpá nɩ, basǝmprǝ na kǝbasoro, bɛrɛ baŋunii kpataa ba wala ka na jaŋ na gʊpayarɩ ACIIBAA.

Ataya ACAƉE Nuureeni, Ɖepitee gʊcɩncaŋa gʊbʊmbɔnɔ nɩ na Mɛɛr ATA Amiiɖu Bashɩɖɩ kakɔmin kanɖiyar ba tǝɖǝ ka ɖambara ba kǝl gakonu ma. Sáà nɖee ba kpa gayarɩfala nɩ ma, na Nuureeni a nyiŋǝ ashee gʊyà. A boŋo ma, n’a kɔɔ na gʊcɩncaŋa kɩsaafɩ aɖʊ gʊyà ACIIBAA anyɛ nɩ.

Ba boŋo gani ma, na ba kʊn bawor ace ʊwalʊ kaaɖu. ACIIBAA anyɩʊtaja a cam ʊwǝlǝ ma ka wʊɖa gaɖǝn na lǝ na shee bɛrɛ baŋunii awu nsala na ganɔ gaɖǝn kaalei na. Aɖi aɖi baja kpataa ba cam ʊwǝlǝ alǝ babʊnʊwǝlǝ ashee bɛrɛ. Ɩ lee ʊciŋkǝrka ashee anii kǝbapi Togoo na Benɛɛ. Gaja ga tǝ̂ n’atʊ bʊja bʊfɔlɩ.

Nuhum BABA BƆƉƖ SAALIFU

Laisser un commentaire