Naagayili kajiŋgiri abʊmbɔnɔ kantǝma

 Yofo ‘aŋɔrɔ tǝb-n’ʊɖǝn kaja ‘ʊshilé tǝb-n’ɩkolom kʊja, gaja kotoku-banyɩʊ-na-tǝb-n’ɩnan, ʊ lee ka ʊshilé nɖee Naagayili kǝbaja ba ɖoo, basǝmprǝ na basoro a lee bajiŋgiri ɖe kantǝma ma. Ʊshilé ɖe gajaka, basǝmprǝ ba ɖoo ali bʊto arŋǝ aŋkʊra mana. Bakucǝja baɖe ba tɩ faŋa nfʊrʊkɔ, atala na man na sǝmaŋ na fɔrɔ. Bayifala baɖe ba tɩ kǝu n’ɩsɔfɩrɩ na ce n’alaŋ, baɖǝn baɖe ba ɖa jiŋgiri kanɖi laŋ na bɔ sǝmaŋkaŋkra ɖe na pɛmpɛŋɛ gɩshɛbʊ.

Apá nɖee ɩ ɖa asǝla na Naagayili ma, ba pɩ atɩ lee ntǝma nɖe gboo. Apá ɖaa Ataba, Boɖi na Penesul ma. Baŋono mpá nɩ ba ɖa ŋkǝŋ na kiɖe ɖaa ntǝma n na sara ma, na ɖʊ bɛrɛ ɩkashɩ, basǝŋŋono baɖe ba tɩ yɩɖa atulo, bagǝŋgǝŋǝkǝja baɖe ba tɩ kǝ agǝŋgǝŋǝ na sheeshee na bɛrɛ. Ba tɔɔ ntǝma nɖe gajaka halɩ gɩjibɔŋɔ ; gaɖu ga tɩ́ na shee ŋkomo ma, na ba kal ɩfǝtǝla atǝwǝ na ntǝma. Ba tɩ́ lǝ wàà ba bôŋo ntǝma nɖe ma, ɩɖe tɩ kǝ bʊkɔŋkɔŋɔ bʊriu gɩjibɔŋɔ.

 Naagayili kajiŋgiri abʊmbɔnɔ
Naagayili kajiŋgiri abʊmbɔnɔ

Ʊshilé ɖe ʊ ta kpa Naagayili mpá nɩ, ɩ san na bɛrɛ pɩ ɖaa jɩŋgaarɩ ɖǝn na ma. Gaja ga pêle koŋkaarɩ ashee bɛrɛ baɖe ɖaa ba wala alee Gaja kantǝma nɖe ma.

Aŋɔnka : AYAGAƱ Muniiru, Naagayili.

Nuhum BABA BƆƉƖ SAALIFU

Laisser un commentaire