Anii kǝbayarɩ bajɩŋgaarɩ gaja kotoku-banyɩʊ-na-tǝb-n’ɩnan

Anii kapá Togoo na Benɛɛ kǝbayarɩ

Alahaɖɩ yofo ‘aŋɔrɔ tǝb-n’ɩnyɩʊ kaja ‘ʊshilé akoo kʊja ʊ lee ka ʊshilé nɖee anii kǝbayarɩ ba wala ajɩ jɩŋgaarɩ ma. Jɩŋgaarɩ ɖe a kɔɔ wʊɖa acǝrá kajɩŋgaarɩ gboo. Anii kǝbayarɩ baganɔ gaɖǝn ga jɩ ka wàà : ARAKAA [ARACA]. Gaɖuu ba jɩ jɩŋgaarɩ ɖe ma na gǝŋ, Bashɩɖɩ ʊpacine nɩ kasukuru gɩcɩɩca kaja nɩ.

Bɛrɛɩ ba lee jɩŋgaarɩ ɖe akoŋkaarɩ ma, baŋono Ɖɔktɛɛ Ɖɔktɛɛ TAASƱ SAKARƖ Sulkifilu na Ɖin AƉAMU Jeriwo. Jɩŋgaarɩ ɖe nɩ, ataMiniisǝr AFO Safiu a ɖa ashee spɔɔr na bayifala na bapigii babaamaakɔ ma, a ɖa ŋkǝŋ. KƆFƐ Bashiiru a ɖa ashee ɖaɖaa kabaamʊ kaŋyɩɩ kʊceu ma, a ɖa ŋkǝŋ. A lee ka arɛ̀ nɖee a pɩ jɩŋgaarɩ ɖe nɩ na Miniisǝr nɖee a ɖa ashee ɖaɖaa kayɔkɔ ma, aganɔ. Acǝma asʊ̀rá asʊ̀rá anii kapá na kɔmin nɩ, ɩ ɖa jɩŋgaarɩ ɖe nɩ. Halɩ gakoloŋ acǝma ɩɖǝn ɩ ɖoo na Wakee kagʊsaʊ gboo apɩ atǝgaɖu Bashɩɖɩ atɩya. Ba cɩ ɩbobo gboo jɩŋgaarɩ ɖe nɩ. Ama naa ba ye sǝba ɩbobo ɖe, Alaaji AƉAM Abubakarɩ, Abusko a laa ɩbobo kɩmʊra afaŋa bɛrɛ naa gʊcǝrá gʊɖe nɩ nawɩya a pàá tɩ ɖa ncǝn na. Mbaɖee ba ci ɩbobo ɖe ma gǝŋ, Basǝɖa na Naagayili kǝbaja.

GʊGʊ kaŋkulo gboo n ɖoo jɩŋgaarɩ ɖe nɩ, aɖoo n’abʊpá asʊ̀rá asʊ̀rá. Abʊpá asʊ̀rá asʊ̀rá ɖe ɩ ɖoo ɖaa abʊpá ɩshɩnyɩʊ ma. GʊGʊ kaŋkulo n ɖoo na gaja k’ɩŋɔrɔ kagʊbɔ gaja kotoku-banyɩʊ-na-tǝb-n’ɩkolom kagʊja afaŋa bɛrɛ. Abʊpá ɖe ɩŋunii, na gɩkrǝ anii na gɩ ŋɔn na ɩ. Bɛrɛ baŋunii bɩcine ɩ ta kǝ̂r ɖaa atɩgɩkrǝ anii gɩ na ce ŋyɩɩ ma.

Anii kǝbayarɩ baɖe ba na lee koŋkaarɩ na, na yɛɛ anii kǝbapi ba wʊ̂ɖa ganɔ gaɖɔŋkɔnɔ, na lǝ na rǝŋǝ na bawor. Bayarɩ baɖe ba pa tǝb-na-ganaana, ama bayarɩ mbaɖee kǝ ba lee anii kǝbayarɩ na ma, ba pɩ jɩŋgaarɩ ɖe nɩ gboo.
Rahaman ƖSA ASIS

 

Laisser un commentaire