Sulsbak kǝbaja bʊjeɖu gakoloŋ 2017 SIL kaatǝnleeɖu

Alaarba yofo ‘aŋɔrɔ asǝba ‘ʊshilé akoo-n’ɩkolom kʊja gaja kotoku-banyɩʊ-na-tǝb-na-kulumi na ɩgbɛ nɖee a ɖa Gajaamatǝna kampá nɖee na Bashɩɖɩ kakɔmin ba jɩ gʊsoro ma, ba pɩ atɩ jeɖe atʊ GʊGʊ agatǝnleeɖu. Gajaamatǝna kampá nɖee ba na yɩɖa wàà, Sulsbak ma, nɩ na ba ɖoo na ma.

Baa tam apaŋa na ba pɩ Bashɩɖɩ atɩya, ba tɩ pɩ atɩ na jeɖe atʊ atǝgatǝnleeɖu. Laŋ na ba kpa gakoloŋ ma, ba lee koŋkaarɩ apɩ atɩ jeɖe atʊ. Ba kpa atǝgatǝnleeɖu ma, ɩ cɔɔ lee ʊciŋkǝrka ashee atʊ. Na gɩ sǝ alee faawɩɩ na pɩ.

Ɩgbɛ ɖe a na kaŋa n’ataMɛɛrii na cǝ ɩsukuru kaku, na cǝ ɩlogita kaku naa naa kaŋa na bakompi. Gani kaŋkǝm, ba tɩ pɩ na bʊŋǝ na ɖʊ Bashɩɖɩ kalogita abʊmbɔnɔ nɩ ; bɛrɛɩ kǝ ba na ŋǝ gɩshɛbʊ na ma, baɖe ba tɩ ce atɩ na shee ɩtanɩ cei cei na cam bʊŋǝ bʊɖe.

Sulsbak kǝbaja n’atɩŋkulo

Ɩgbɛ kanɖiyar ʊsoro Fɔlkɛr RAUK n »akǝŋja ʊsǝmprǝ Ɛlfriiɖǝ MOOR ba pɩ ka GʊGʊ agatǝnleeɖu. Bɛrɛɩ ba toŋo pɩ apɩ na ma ma, na gǝŋ ataMɛɛr ʊrɔŋ kaja ʊŋono GOMINA Abubakarɩ, ataMɛɛr aŋono ʊŋono ATA SAALIFU Amiiɖu, KUƉORO Fuseena, ABUƉU ƉOROGI Maliki n’arɛ̀ nɖee ba toŋo apɩ na ma a na kʊɖa gɩjaamakrǝ na gɩfaraŋshɩkrǝ ma.

Rahaman ƖSA ASIS

Laisser un commentaire