Ɖebora MƆRTƆN a cam aɖɔktoraa

Ɖebora a lee ʊpigii Amalɩka kaja na. Bʊja 2006, 2009, 2011 na 2012 nɩ, a pɩ atɩ sǝ Bashɩɖɩ gɩcɩɩca aceu atɩgɩkrǝ ayɛɛ kʊnyaʊ ɖaa gɩ na lǝ jɩ ma. Bʊja bʊɖe kaŋkǝm na a sǝ Amalɩka alee koŋkaarɩ awaɖawaɖa atɩgɩkrǝ akpa ncǝncǝn. Bʊja tuutuuma mbʊɖee a tɔɔ ayɛɛ n’ʊyɔʊ ɖe ma, kaŋkǝm a ɖoo na mbʊpá mbʊmbɔnɔ nɖee n na faŋa bʊkɔ́ɩ a ceu atɩgɩkrǝ naa aŋǝ ma. Mbʊpá nɖe nɩ, bʊkɔ́ɩ Ɖebora a tǝŋǝ ceu ma na gǝŋ akalɩ [verbes] bʊlei nɩ.

Ɖɔktɛɛ MƆRTƆN Ɖebora n'ambʊpá
Ɖɔktɛɛ MƆRTƆN Ɖebora n’ambʊpá

Gǝŋ ma ɩɖe tɩ faŋa wàà, atɩgɩkrǝ jɩ a laa na yɛɛ n’ʊyɔʊ. Ʊyɔʊ ɖe a na yɛɛ ma, a naa bôŋo, aɖe câm ʊlɔ ʊbʊmbɔnɔ nɖee ba na yɩɖa wàà, ɖɔktoraa ma.

Ʊrɔŋ ɖaa gɩ na shee laabaarʊ Ɖebora laŋ wáá ma, a cam ‘ʊlɔ ʊbʊmbɔnɔ ɖe (ɖɔktoraa) boŋo ɖoo afɔnɔ ‘aŋɔrɔ 8ja ‘ʊshilé 10ja gaja 2014. A pra Ɖɔktɛɛ MƆRTƆN ; a wʊɖa ʊyɔʊ ʊbʊmbɔnɔ nɖee ʊ na faŋa wàà, a taa sǝ̂ra afaŋa ʊyɔʊyɛɛka kasukuru abʊmbɔnɔ nɩ ma.

A pra afaŋaka gboo na faŋa ʊyɔʊ kasukuru abʊmbɔnɔ nɩ Amalɩka.

Hakiimu ATI KALAM

Laisser un commentaire