Anii kǝbayarɩ bʊwalʊ kacaacaa

Asiibi afɔnɔ ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩnan kʊja, gaja kotoku-banyɩʊ-na-tǝb-n’ɩkolom (2016) nɩ na ba lee bayarɩ bʊwalʊ Penesul kampá nɩ. Naa ʊwalʊ ɖe kʊshilé ʊ ye kpa, ba cee lee caacaa ɖǝn na yɛɛ ba lîge n’ataya GƆMƆ IƉIKUKU YAAKUBU laŋ ; ŋyɩɖa nɖee ba yɔ na nɩ ma na gǝŋ Sarabaa, Gaja ga lêe nɩ gaafara.

GʊGʊ kaŋkulo n lee ka koŋkaarɩ ashee caacaa ɖe kabaamʊ. Ɩcaacaa banyɩʊ pɩ ba lee ashee bapi na kǝbaŋono. Bapi baja a lee ka ayɔkɔlaaka na baŋono baja a lee apǝrǝcǝka. Ba lee ɩcaacaa banyɩʊ baɖe ma, bɛrɛ beriiriu pɩ ba laa bajɩka. Bayɔkɔlaaja beriu, bapǝrǝcǝja gboo beriu. Kaŋkǝm, bapi mbaɖee ba shɩ lee koŋkaarɩ ashee ayɔkɔlaaka caacaa ɖe kanɖi laŋ ma, baŋunii ba cam ajɔɔ, anyɔnna mbaɖee kǝ ba ɖa bajɩka nɩ na ma, baŋunii.

Naa gɩ ŋǝ̂ apǝrǝ acam anii kapá nɩ, GʊGʊ kaŋkulo n yeeyee ka n’apá ɖe ɩŋunii acam ɩ. Ama k’ɩ lee ba laa ka kǝbajɩka na. Bayɔkɔlaaja nɩ na GʊGʊ kaŋkulo n laa bajɩka.

Ayɔkɔlaaja kacaacaa katɔnɔka
Ayɔkɔlaaja kacaacaa katɔnɔka

Kîɖe ma atɩya aŋǝ ayɔkɔ nɖee bapi baŋunii ba laa ma :
http://revue-gugu.org/photos/album10/index_blo.html
http://revue-gugu.org/photos/album10/index_blo.html#PhotoSwipe1492178583341

Baa njǝŋ gɩ tɩ nyiŋǝ gaafara na shee ataya YAAKUBU Sarabaa naa naa nyiŋǝ anyɩn wàà, ɩ pâla gɩ lêe ganɔ gaɖɔŋkɔnɔ acɩ ɩbobo ashee atɩgɩkrǝ anii kʊŋɔn na kʊtʊr kaŋyɩɩ kʊceu.

Gɩ tɩ shee anyɩn nsala. Gaja ga kpâ n’atʊ gaja gafɔlɩ.

Mumuni FAFANA

Laisser un commentaire