Ʊwalʊbʊmbɔnɔ ɖǝn Kàraa (Togoo)

Afɔnɔ ‘aŋɔrɔ ganaana kaja ‘ʊshilé ganaana kʊja, na SIL Bashɩɖɩ kaŋkulo n laa amʊ wàà, ma cê ʊwalʊbʊmbɔnɔ ɖǝn Kàraa, Togoo nɩ, na Bashɩɖɩ kaŋkulo kaanɔ.

Amʊ n’atakɔmin nɩ kɩkrǝ kaŋyɩɩ kʊceu kanɖiyar gɩ ce ka ʊwalʊ ɖe. Bɛrɛ ɖaa ɩshɩriu na kaŋkǝm ma, Togoo na Benɛɛ ba ce ka. Bʊkɔ́ɩ bʊ ce n’amʊ ma na wàà, ma tɩ lâa afaŋa ambawor ɖaa n na faŋa atɩgɩkrǝ anii ŋkulo nɖǝn nɩ WasAp nɩ ma.

Bɛrɛ tuutuuma ba ce ka n’afaŋakalka. Ɩshiliriu nɩ gɩ lee n’ʊwalʊ ɖe. Gɩ tʊr abɔ, alee atǝma akulo akulo, akal n’atǝbawor ɖaa baa aŋa a naa lee atǝma agʊsaʊ naa ɩ naa sara gɩshɛbʊ ma. Ʊwalʊ ɖe kanɖiyar na gǝŋ SOSUKPƐ Mart (SOSSOUKPE Marthe). Ʊwalʊ ɖe ʊ lee aŋfaanɩ tuutuuma páá. Kʊboŋu nɩ, gʊna Mart a nyiŋǝ ashee bɛrɛ baŋunii.

Ɩkrǝ kʊwalʊbʊmbɔnɔ Kàraa
Nuhum BABA BƆƉƖ SAALIFU

Laisser un commentaire