GʊGʊ a kɔɔ sǝba ʊɖuú

GʊGʊ cɩɩnɩ kaja ba para ma

Atǝbaya, atǝbana, atǝbaŋono, atǝbapal n’atǝbasoro anii kasamaa aŋunii, ɩ lee ʊciŋkǝrka ashee atʊ gɩ lǝ̂ anyɩn wàà, GʊGʊ cɩɩnɩ kaja a ɖoo.

Ɩ lǝŋ ka gɩ kɔɔ ɖoo na GʊGʊ na ma, k’á yɔ na baɖǝn ba kpa biti. Baɖǝn sul GʊGʊ a yiɖe ŋkǝlǝ̀ njɩ gǝŋ boŋo. Aaɩ, GʊGʊ k’a yiɖe na.

Ama ɩnawɩya bajala baɖǝn ba cee ka pala na ka gɩ sǝra alaa GʊGʊ na. Ɩnawɩya baɖe pɩ gǝŋ ʊshɛɖʊ, atɩŋyofotala nɖee gɩ na lee na GʊGʊ kantǝma ma, kʊpɛɛpɛʊ na gatǝnleeɖu kɩga bʊmanʊ ace Gajaamatǝna [Allemagne] nɩ. Gaja kagɩyarɩ gɩ sǝŋkǝla ma laŋ, gɩ sǝra aɖur ɩnawɩya baɖe kagʊsheme.

Gǝŋ ma, ɩ tɩɩ kɔɔ sǝ̂ra na ŋǝ GʊGʊ ɖaa ɩ sim ma. lien
N’ʊtʊr ʊsoŋsono ma.

Ɩ lee ʊshilé ʊfɔlɩ.

Rahaman ƖSA ASIS

Laisser un commentaire