Basana bacamka

Alaarba afɔnɔ ‘aŋɔrɔ anʊntaja ‘ʊshilé tǝb kʊja na gɩ cam basana Amalɩka kaatǝna nɩ kǝbaja atǝgatǝnleeɖu. Bʊkɔŋkɔŋɔ̀ bʊriu nɩ na gɩ yɔ atǝbawor. Ba pɩ ba yɔ̂ atǝgatǝna n’atɩmpá. Ba pɩ atɩ na yɛɛ ba câm ɩyɔʊ tuutuuma. Ba pa bɛrɛ cɩɩnɩ, sukuru kǝbapi ba kpa kulumi, babafaŋaka banyɩʊ.

Bʊkpaʊ nɩ, gɩ sǝ atǝn naa ayɔ atǝbawor bayɩɖa n’atǝma nɖee gɩ na lee ma. Kaŋkǝm na gɩ sǝba atǝma nɖee gɩ na yɛɛ gɩ lêe ma. Ɩni nɩ gǝŋ, ɖaa gɩ na pala ataɖaɖaa kayɔkɔ ɩ na li ma. Kɩɖǝn nɩ gǝŋ papa alʊka, ʊlɔ ʊfarka na bapi bacǝrá : Amʊ na ʊshilé, amʊ na aŋɔrɔ na pɩmpɩnaa naanaa.

Bapi ba tɩ faŋa ɖaɖaa kagʊcǝrá gʊɖǝn

Ɖaa gɩ ta jɩ̂ ʊjɩʊ aboŋo gɩjibɔŋɔ gɩ na cǝr ma na gǝŋ. Ataɖaɖaa ɖe a pàá tɩ lî na ma laŋ na gɩ lǝ wàà, shee gɩ lâa kɩfilim aɖʊ Guugǝl Plee Stɔɔr nɩ naa atǝbaja mbaɖee ba ɖa atǝbʊrɩɖontǝna na bʊtǝna bʊfɔlɩ nɩ ma, ba naa lige ɩlaŋ na faŋa babapi naa ataɖaɖaa ɖe a pàá tɩ lî na.

Akulo ɩnyɩʊ ɩ tɩ cam filim

Gɩ sǝba ɩ kʊlaaʊ tɔɔ na yofo ‘aŋɔrɔ anʊntaja ‘ɩshilé tǝb halɩ tǝb-n’ɩnʊn na basana baɖe. Bayɩɖa nɩ gǝŋ : Noweeliya [Noelia], Renee [Renee], Rosa [Rosa], Abii [Abby], Ɖaniyɛl [Daniel], Rayan [Ryan], Fransis [Francis], Ɖebora [Deborah], Fiktɔɔr [Victor]. Ba pɩ atɩ cam ʊyɔʊ apele, atʊ gboo gɩ cam na pɩ ʊyɔʊ apele.

Gɩ tɩ cam papalʊka kafilim

Atalaata afɔnɔ ‘aŋɔrɔ anʊntaja ‘ʊshilé tǝb-n’ɩnʊn kʊja gɩshilikɔnɔ n’atǝganɔ gɩ man aɖoo naa ace atɩ yɔ mpá. Gɩ faŋa pɩ bʊpaɖu bʊŋunii, afaŋa pɩ gayarɩfala. Baɖe gboo ba ɖoo na sukuru kǝbapi mbaɖee ba na cere ɩŋgilɩshɩ ma.

Alaarba afɔnɔ ‘aŋɔrɔ anʊntaja ‘ʊshilé tǝb-n’ɩkolom kʊja gɩjibɔŋɔ na gɩ ce atɩ jaŋ na pɩ atǝganɔ anyɔnna sukuru kǝbapi baɖe na bafaŋaka gaɖucamka basana kaafala nɩ [Romance]. Gɩ jɩ ʊjɩʊ, anyem akun gɩshɛbʊ naa aye nyiŋǝ ashee pɩ wàà, Gaja ga shêe pɩ sáà naa ba kɔ̂ɔ n’alaafɩya. Gaja ga kʊɖa alaamɩshɩ afɔnɔ ‘aŋɔrɔ anʊntaja ‘ʊshilé tǝb-na-kulumi ma, na ba ɖoo akpa lɔɔrɩ ace Kʊtɔnʊ. Alahaɖɩ afɔnɔ ‘aŋɔrɔ anʊntaja ‘ʊshilé akoo kʊja na ba ta Kʊtɔnʊ ace Amalɩka kaatǝna nɩ. Gaja ga kpâ na pɩ ŋkǝŋ alaafɩya.

Laisser un commentaire