Arɩsǝma afɔ́nɔ̀ ‘aŋɔrɔ tǝb-n’ʊɖǝn kaja ‘ʊshilé ʊriutaja gaja kotoku-banyɩʊ-na-tǝb-na-kulumi na GʊGʊ kaŋkulo n togo ŋkɔ́lɩ ɩshɩnʊn kanja WasAp nɩ. Ɖoo gaja kotoku-banyɩʊ-na-tǝb-n’ɩnʊn kaŋɔrɔ aboŋoka ‘ʊshilé akoo kʊja na gɩ togo ŋkɔ́lɩ nsǝbaka, ɩɖe tɩ lee bayarɩ bʊwalʊ nɩ [ARACA 2015] Bashɩɖɩ kasukuru ajala nɩ. Gɩ sǝba akɔ́lɩ ɖe nɩ na GʊGʊ kaŋkulo n’anii kǝbapi baɖǝn cei.
Ama ʊrɔŋ wáá, ɖaa bɛrɛ bʊsǝwa bʊnʊn na kaŋkǝm ma, ba na cam akɔ́lɩ ɖe arɩsǝma baa apaŋa na. Akɔ́lɩ kʊtogu ʊ lee ʊciŋkǝrka ashee anii kǝbapi na samaa nɖee a na cam ɩ ma. Aɖʊwaa baɖǝn ba tɩ cam akɔ́lɩ ɖe kǝ ba lee anii kǝbapi na. Gǝŋci gboo k’ɩ lee anii kanɖǝnɖǝn na gɩ na lee n’akɔ́lɩ ɖe na, gɩ tɩ lee n’ɩkrǝ ɩfɔlɩ ɩɖǝn gboo ɖaa gɩfɔnɔ, gɩjaamakrǝ, gɩgɛɛshɩkrǝ n’ɩɖǝn acǝŋǝ…
Ŋkɔ́lɩ ɩshɩnʊn kanja n lee nɖee n na lǝ ganɔ gaɖǝn kaalei ma na ; na gɩ wala atǝbawor ajɩ kajɩŋgaarɩ. Bɛrɛɩ ba na cam akɔ́lɩ ɖe ma, ba tǝ ba ŋǝ̂ wàà, ɖaa ba lee ŋkɔ́lɩ nɖe ma, n fǝlǝ n’ɩsaaka nɖee gɩ cee na togo ma. Atɩnɖiyar Martɛɛŋ a lee ka fiɖiyoo ajala nɖee gɩ togo ɩkʊnakʊna ba toŋo kulikuli ma.
Ŋkɔ́lɩ nɖe n tɩ faŋa wàà, ganɔ gaɖɔŋkɔnɔ k’aa fǝ̂r akoɖǝn kʊleu ayɔ na.
N’ʊtʊr ma ! Ɩ ta naa yɛ̂ɛ ɩ naa ŋǝ akɔ́lɩ ɖe, tôgo ma anyanɔmba ashee atʊ nɔmba nɖe laŋ +229 66 66 11 11.
Aŋɔnka : IBRAHIM INUUSA Malookiya
[avatar user= »malokia » size= »original » align= »left » /]