Sǝba n’afɔ́nɔ̀ ‘aŋɔrɔ tǝb-n’ɩnyɩʊ kaja ʊshilé tǝb-n’ʊɖǝn kʊja, gaja kotoku-banyɩʊ-na-tǝb-na-cɩɩnɩ, na gɩ sǝba na cere koloji kǝbapi atɩgɩkrǝ anii KLAAK kaatǝnleeɖu.
Naa gɩ ye sǝ̂ba, KLAAK kanɖiyar na gɩ wa na ma na naɩ, asǝ anyaʊ ʊshilé na gakɔŋkɔŋɔ̀ ŋgaɖee gɩ naa sǝba halɩ atɩ boŋo ma. Gɩ lǝ arǝŋǝ n’atǝbawor boŋo ma, n’ʊŋono KOTA INYAS a ye wa na sukuru kǝbapi mbaɖee ba na ce agatǝnleeɖu na tʊr abʊpá ma, na ba tɔɔ saawara. Basaawara kʊtɔɔʊ ɖe nɩ na ba yiɖe wàà, alaarba baa apaŋa na gɩ naa cere atɩgɩkrǝ bʊkɔŋkɔŋɔ̀ tǝb-n’ɩnyɩʊ halɩ gaɖǝn gɩshilikɔnɔ.
Gɩ sǝba n’anii kɩɩbii halɩ atɩ yɔ na tʊr bʊlei atɩ kpa abʊpá laŋ. Ama sáà nɖee COFID-19 a kpa ma, na gɩ pala naɩ na kiɖe atalaafɩya. Gɩ tɩ tɔɔ niya gɩ kɔɔ sǝba ʊshɛɖʊ ɖe ʊ na bon na ce wáá ma. Aɖʊwaa gɩ ŋǝ wàà, bapi baɖe ba wʊɖa koŋkaarɩ ashee bagɩkrǝ.
