Atɩgɩkrǝ ! Gɩ cê ŋyɩɩ !

Samaa gɩ tɩ yɛɛ gɩ lǝ̂ anyɩn waa, atɩgɩkrǝ anii kʊŋɔn na kʊtʊr ɩ tɩ ce ŋyɩɩ boŋo. Aɖʊwaa atɩlaabaarʊ mbaɖee gɩ ŋɔn afǝl ma, ba ɖa ɛntɛrnɛt laŋ. Ɩ ta tîne nɩ, ɩ tɩɩ sǝ̂ra aŋǝ baŋunii atʊr. Gɩ wʊɖa ɩlaabaarʊ kɩwaseeka baja ba na yɩɖa waa [blog] na gɩfaraŋshɩkrǝ naa gɩ tɔɔ na yɩɖa n’ atɩgɩkrǝ gboo waa blɔg ma. Baa sáà apaŋa na, ɩ ta tîne ɛntɛrnɛt ɩ tɩɩ naa ŋǝ̂ ɩlaabaarʊ mbaɖee ba shɩ na fǝl atǝgatǝnleeɖu atɩya ma. Ɩ ta kîɖe, ɩ tɩɩ ŋǝ̂ waa Benɛɛ nɩ, Togoo nɩ, atɔɔ acǝ apá ɩfɔlɩ nɩ, atʊ anii kǝbaja gɩ lee ka basǝbaka gɩ na lee blɔg n’ atɩgɩkrǝ ma.

2013_12_13_IR_Anii-Logo_400px

Atɩgɩkrǝ ! Gɩ cê ŋyɩɩ !
Atɩgɩkrǝ ! Gɩ cê ŋyɩɩ !
Atɩgɩkrǝ ! Shee gɩ yɔ̂ jɩ kʊŋɔn na kʊtʊr !
Waasɩwaasɩ nɖee gɩ ŋɔn waa ma, a lee bʊkɔɩ atǝbaya n’ atǝbana ba cee na lo ɖoo bʊja akoo-na-tǝb ashee atɩgɩkrǝ kaŋyɩɩ kʊceu ma na.

Rahinatu ISIFU

Laisser un commentaire