GʊGʊ kaŋkulo n ɖoo Bashɩɖɩ kʊwalʊ nɩ

Gakoloŋ GʊGʊ kaŋkulo n lee koŋkaarɩ aɖoo Bashɩɖɩ kʊwalʊ nɩ. Ʊwalʊ ɖe kʊsǝbʊ na gǝŋ anɔɔbʊnka kaŋɔrɔ ‘ɩshilé akoo-n’ ɩkolom. Ʊwalʊ ɖe nɩ bɛrɛ tuutuuma ba ɖa ŋkǝŋ. Ʊwalʊ ɖe kamboi ba na yɩɖa waa [ARDABs] ma, n laa afaŋa bɛrɛ bʊkɔɩ n sǝra alee ma. Naɩ naa mboi n ye cam ʊwǝlǝ, Bashɩɖɩ kalimaamʊ a nyiŋǝ ka ashee ʊwalʊ ɖe naa alǝ waa, sǝ̂ba n’ alaafɩya naa gɩ bôŋo n’ alaafɩya. Ama arɛ̀ nɖee a tine ʊwalʊ na Mɛɛr aganɔ ma na gǝŋ Mɛɛr akǝŋja asǝbaka ba ba yɩɖa waa, SHABƖ LAKƱ Mufutafa ma.

Ŋkulo n tɩ faŋa bɛrɛ anii kabʊpa
Ŋkulo n tɩ faŋa bɛrɛ anii kabʊpa

Ʊwalʊ ɖe kʊtinu nɩ, ba shee GʊGʊ kaŋkulo ganɔ n lǝ koŋkaarɩ nɖee n na  lee ma. Ama bʊkɔɩ ŋkulo nɖe n laa afaŋa bɛrɛ ma na gǝŋ bʊlinyaʊka na kɩmaana anii na gɩfɔnɔ na bʊlinyaʊka na kɩmaana gɩfɔnɔ na anii. Aɖʊwaa mbʊpa nɖe n na pala ɩkrǝ ɩ na kpa ɩwor nɩ. Bɛrɛ baŋunii mbaɖee ba ɖa ʊwalʊ ɖe nɩ ma, bɩcine ɩ ta kǝr.

Kʊboŋu nɩ na atʊga Martɛɛŋ n’ akar Stɛfani ba lǝ waa, ɩ sim ba lêe baŋono baɖǝn gʊjɔɔ bʊlinyaʊka kabʊpa ɖe. Baŋono baɖe pɩ gǝŋ : GƆMƆ Yaakubu Sarabaa, GOMINA Mahasu, KALAM Karim ba lee ka bɛrɛ mbaɖee ba tɔnɔ asǝba anii kʊŋɔn kakoŋkaarɩ ma. Bani baŋkǝm na ba shee ataMɛɛr ATA SAALIFU Amiiɖu, limaamʊ IƉIRIISU Bashiiru, gʊsǝɖɩyarɩ Aciibaa anyɩʊtaja, Bashɩɖɩ kʊwalʊ kʊŋono AMAƉU Aɖam, anii kagɩkrǝ kaŋyɩɩ kʊceu kʊŋono GOMINA Abubakarɩ na AFO KOSIŊKAŊ Fuuɖu anii kafaŋaka Bashɩɖɩ ashee koŋkaarɩ ba na lee na shee atɩgɩkrǝ ma.

Gɩ faŋa bɛrɛ abʊpa asʊ̀rá asʊ̀rá nɖee gɩ wʊɖa ma, na gaja kɩŋɔrɔ kagʊbɔ 2014 kagʊja na ba shɩ cei cei.

Rahaman ƖSA ASIS

Laisser un commentaire