Bashɩɖɩ kʊwalʊ 2013 kabʊlinyaʊka

Yofo ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩkolom kʊja na ba tine Bashɩɖɩ kʊwalʊ ʊbʊmbɔnɔ. Kaajɩkʊɖaka ʊshilé akoo-na-kulumi kʊja na gɩ ce Bashɩɖɩ kaayifalfala nɩ ashee ʊwalʊ ɖe kabʊlinyaʊka.

Ʊwalʊ kabʊlinyaʊka gayifalfala nɩ
Ʊwalʊ kabʊlinyaʊka gayifalfala nɩ

Atʊsǝu gayifalfala gaɖe nɩ, ʊwalʊ kaɖi baja ba laa bʊkɔɩ ba lee halɩ atɩ cim sáà ɖe ma, afaŋa. Ŋkǝŋ na ba na lǝ ɖaa ɩtanɩ nɖee bɛrɛ ba na ɖʊ na shee baa ʊwalʊ ʊpaŋa kanɖi laŋ ma, bʊkɔɩ ɩtanɩ ɖe ɩ na fɔɔshɩɩ na shee Bashɩɖɩ kaarɔnɖismaŋ ma.

Na ba kɔɔ na lǝ na shee Bashɩɖɩ kʊpi baa apaŋa na waa, a lêe koŋkaarɩ, baa gafala gapaŋa nɩ aɖʊ ɩtanɩ kotoku ɖǝn na saa na gajɩfɔlɩ kʊwalʊ. Naa ɩ ta tɩ jɩ̂ waa ba tɩ yɛɛ ba lêe akoɖǝn, ba paa tɩ sǝ na saa waa, maa ʊba a naa lêe ashee nshɩɖɩpa na.

Aɖʊwaa ba tɩ laa na faŋa waa, naa Bashɩɖɩ akoloji anyɩʊtaja a sǝ, ɩtanɩ nɖee ba na ɖʊ na shee ʊwalʊ kanɖi laŋ ma, na ba tɔɔ asǝba na koloji ɖe. Ʊba a ŋǝ waa ba sǝra asǝba gǝŋ ma, n’a kaŋa na pɩ. Ʊba ‘ʊkaŋʊ na ma kaŋkǝm, na Jaama kǝbaja gboo ba ye pɩ atɩ ɖʊ gʊnyɛ.

Ʊshilé ɖe, GʊGʊ kaŋkulo n ɖoo na bʊlinyaʊka na kɩmaana anii na gɩfɔnɔ kambʊpa, abʊpaɩ ba na lee ma, GʊGʊ kɩlaabaarʊ ba na yɩɖa waa blɔg ma, afaŋa bɛrɛ baŋunii.

Gani kaŋkǝm, na ba pɩ na bafǝlanɖɩja na bapaja babʊlei ; ɖaa bafǝlanɖɩja bɩna ɩ na jɩ bɛrɛ bayɔkɔ ɩwara nɩ ma.

Ba kɔɔ lǝ ashee ɖaa mpa nɩ kayɔkɔɩ ɩ sim ba naa kɔ̂ɔ n’afaŋa ɩlaŋ naa mpa n ce ŋyɩɩ ma. Ɩni na gǝŋ ɖaa : Spɔɔr, sukuru bajala na babʊmbɔnɔ kǝbapi baŋyɩɩ kʊceu, Kparakʊ kʊpeli kʊpɛmpɛŋʊ na mpa nɩ kɩnyɩŋca kayɩɖa ɩsheeka …
Ŋkǝŋ na ba na laa na faŋa waa, ɩ sim baa arɛ apaŋa a cɩ ɩbobo ashee ampa kaŋyɩɩ kʊceu.

Ba boŋo ma, na ba tɩ mboi nfɔlɩ.

Mumuni FAFANA

 

Laisser un commentaire