LAŊƎ Falerii na GRAAFƎ Jɛni bʊpɩʊ GʊGʊ agatǝnleeɖu

Galaɩ gajaka na ce gakɔŋkɔŋɔ̀ tǝb-na-gaɖǝn na bapigii Jaama kǝbaja banyɩʊ LAŊƎ Falerii na GRAAFƎ Jɛni ba ɖoo n’Ʊlampǝl apɩ atǝgatǝnleeɖu. Bapigii baɖe ba pɩ pɩ atɩ jeɖe GʊGʊ agatǝnleeɖu naa akiɖe ɖaa gatǝnleeɖu n’atǝma kayɔkɔ ɩ ɖa ma. Gatǝnleeɖu gaɖe kʊjeɖu nɩ, ba ŋǝ abʊpa ɩtʊrka ba lee na gɩfɔnɔ ashee Afrɩka kǝbapi ma.

Abʊpa ɖe ɩ cǝm na pɩ halɩ ba tɩ yɛɛ ba shɩ ɩ gboo aɖʊ abʊpa kaŋku nɩ Ʊlampǝl, aɖʊwaa ŋkǝŋ na ba na lee ntǝma. Ntǝma nɖee ba na lee Ʊlampǝl ŋkǝŋ ma na waa, ba na kaŋa na bapi pɩ na faŋa pɩ ʊtʊr.

LAŊƎ Falerii na GRAAFƎ Jɛni
LAŊƎ Falerii na GRAAFƎ Jɛni

Gɩ lîge anyɩn waa bantǝma kǝ ba na sǝla pɩ na, ɩ lee bʊkɔɩ ba tǝm pɩ ba pɩ̂ atɩ lee ma na. Bʊpɩʊ ɖe ʊ pala ba yɔ GʊGʊ kaŋkulo kǝbɛrɛ baɖǝn ; ɩ ta cɔɔ lee ʊciŋkǝrka ashee pɩ.

Ba na shɛʊ ma, na ba cam GʊGʊ baŋunii kɩwǝlǝrǝŋǝka [enrégistrements audio] ; aɖʊwaa ba wʊɖa GʊGʊ baɖe baŋunii abʊpa kaŋku nɩ Ʊlampǝl ŋkǝŋ. Kǝ ba yɔ ʊtʊr na anii na ma, laŋ ɩwǝlǝrǝŋǝka ɖe ɩ nɩɩ kâŋa na pɩ ba naa sǝ̂ra na tʊr GʊGʊ na shee bɛrɛ.

Rahaman ƖSA ASIS

Laisser un commentaire