Alaafɩya kʊwalʊ Ʊlampǝl

Asiibi afɔnɔ ‘aŋɔrɔ anyɩʊtaja ‘ʊshilé  ganaana kʊja gaja kotoku-banyɩʊ-na-tǝb-n’ɩnan, na GʊGʊ kaɖi baja ba laa ŋkulo nɩ kǝbɛrɛ banan. BABA BƆƉƖ SAALIFU Nuhum, ISIFU SƱMAANƱ Mʊstafa, ALƐ JƆBƆ Fuseeni na BABA BƆƉƖ Saliimatu ba ce ka Alaafɩya kʊwalʊ Ʊlampǝl. Balampǝla ba wala ʊwalʊ ɖe na, na yɛɛ bampá  kaŋyɩɩ kʊceu. Bɛrɛ tuutuuma ba ɖoo ka na bʊɖu apɩ.

Alaafɩya kʊwalʊ
Alaafɩya kʊwalʊ

Naa ba ye tîne ʊwalʊ, mpá kalimaamʊ a cam ka ʊwǝlǝ anyiŋǝ ashee bɛrɛ baŋunii, na ba ye sǝba ntǝma. Togoo kaatǝna kanɖiyar Fɔɔr, a laa bɛrɛ atǝm ʊwalʊ ɖe kanɖi laŋ. Ʊshilé ɖe k’ɩ lal na ʊwalʊ kanɖǝnɖǝn na. Ba tine sukuru ajala kaku ɩnyɩʊ ɩɖǝn ba cǝ ɩfɔlɩ ma. Ʊŋono ƉRAMAN Ɖramanii gʊcɩncaŋa gʊbʊmbɔnɔ kʊŋono a tǝɖǝ ka ɖambara ba kǝl ma, na Gatǝna kanɖiyar aganɔ.

Ʊwalʊ ɖe nɩ, GʊGʊ kaŋkulo n faŋa bɛrɛ abɔ nɖee ba lee na gɩkrǝ anii ma. K’ɩ lal n’ʊfaŋʊ kanɖǝnɖǝn na, ba yʊga bɛrɛ bʊbʊkǝli na faŋa ɖaa ba ŋǝ̂  gɩkrǝ anii ɛntɛrnɛt laŋ ma. Ʊwalʊ ɖe ʊ lee ayiɖoo ashee bɛrɛ baŋunii. Ʊɖǝn ‘ʊcine k’ʊ pɩyɛ na.

Nuhum BABA BƆƉƖ SAALIFU

Laisser un commentaire