Atǝgatǝnleeɖu katǝma gɩ lee ma

Gakoloŋ, gaja 2014 kaŋɔrɔ ariutaja kɩbɔkɔɩ banyɩʊ baboŋoka, gɩ pɛmpɛŋɛ atǝgatǝnleeɖu ga kɔɔ cǝm awu ɖaa gɩ cee pɛmpɛŋɛ ma. Tɔɔ n’aɖɩtɛnɛɛ aŋɔrɔ ariutaja ɖe ‘ʊshilé tǝb-na-kulumi kʊja halɩ ‘ʊshilé akoo-na-cɩɩnɩ kʊja na gɩ lee atǝma tuutuuma. Atɩŋkulo ŋŋunii n lee ka atǝma ɖe kpataa. Atǝma nɖee gɩ lee ma na gǝŋ wàà, gɩ yʊga atɩŋkulo njɩ akpala ɩnyɩʊ. Amʊ na Martɛɛŋ gɩ tɩ lee ɩɖǝn, ambasoro na Stɛfani baɖe ba tɩ lee ɩɖǝn gboo.

Gɩ pɛmpɛŋɛ atɩntǝma kalɔɔrɩ ; bʊto bʊ mǝr lɔkɔ nɩ ma, na gɩ ko nɩ kotokoto gɩcɩɩca naa acǝɖa cǝɖa rɔɔba kansulo ɩnyine tuutuuma atɔɔ atɛgɛ ncǝn. Bʊto bʊ ta nyî aɖoo, bʊɖe bʊ tɩ sǝ nsulo nɖe nɩ. Ɩwacǝman baɖe ba tɩ yɔ na pɔmpɩ. Atana Stɛfani n’ambasoro baɖe ba ɖa na pɛmpɛŋɛ biroo na cɔcɔ kamana penti. Atʊsoro Ɖebora a ɖa Amalɩka ma, aŋku a na pɩ na ɖa ncǝn ma, n’atabʊpa ɩyalaka kaŋku gɩ na yɩɖa wàà [Librairie Ganaana] ma, gɩ lee ɩ penti. Ɩtokporo na bʊkukonu bʊɖǝn kacaŋkɔ, gɩ fʊba kɩcaayaa ba ci ma, naa aɖʊ bafɔlɩ.

Ŋkulo n tɩ cɔcɔ biroo kamana penti
Ŋkulo n tɩ cɔcɔ biroo kamana penti

Ʊrɔŋ atabiroo a ɖa ayiɖoo awu ɖaa a cee ɖa ma. Aɖʊwaa gɩ pɛmpɛŋɛ ayɔkɔ tuutuuma ncǝn, naa apele ɩfɔlɩ gboo. Ʊtonu kɩlɔ na Ɛntɛrnɛtɩ kɩlɔ gɩ ɖʊ ma, gɩ pɛmpɛŋɛ ɩ kpataa gɩshɛbʊ. Ayofotala ɩfɔlɩ nɖee gɩ pele ma, gɩ ɖʊ ɩ ɩsaafɩ gboo ariŋ. Gɩ lee gʊcaŋkɔ aɖʊ atɩŋku nɖee gɩ na yɩɖa wàà [centrale informatique] ma, kaakukonu na riŋ na saafɩ. Gɩ lee nrukɔ akʊr [projecteur] aɖʊ, k’a kɔɔ lee gɩ tɩɩ naa kʊ̂ɖa nɩ fɔɩfɔɩ na. Atɩntǝma kayɔkɔ ɩɖǝn na kabɔ, gɩ nyaʊ ɩ ɩkɔba nɩ. Atǝma ɖe kpataa, bɔkɔɩ banyɩʊ pɩ gɩ lee alaa alahaɖɩ aŋɔrɔ ariutaja ɖe ‘ʊshilé akoo-n’ɩriu kʊja apala.

Atabiroo kabʊcǝma, shee arɛ̀ a kpâ ncǝn naa aŋǝ ɖaa ɩ ɖa ma. Atǝgatǝnleeɖu ga ɖa gbagbaraa ashee arɛ̀ baa apaŋa a jêɖe atʊ aŋǝ ɖaa atɩntǝma n na sara ma.

Hakiimu ATI KALAM

Laisser un commentaire