Ʊyɔʊcamka

Yofo ‘aŋɔrɔ akolontaja ‘ʊshilé cɩɩnɩ kʊja Gaja kotoku-banyɩʊ-na-tǝb-n’ɩnan, ʊ lee ka ʊshilé nɖee GʊGʊ kaŋkulo kaɖi baja ba yɩɖa anii kapá ɩŋunii Togoo na Benɛɛ, kabʊmaŋkǝli kǝbakiɖeja ʊyɔʊcamka ma, SIL kaatǝnleeɖu Bashɩɖɩ ŋkǝlǝ̀ Ajegulɛ. Ʊshilé ɖe na gɩ yɩɖa wàà : « Abʊtʊrka kʊshilé ». GʊGʊ kaŋkulo n lee ka nsǝbaka akpa gatǝnleeɖu atɩ aboí na saa na basana. Na ce ɖaa bʊkɔŋkɔŋɔ cɩɩnɩ n’anaŋa ɩtʊrka ma, na basana ba sǝba ʊkpaʊ.

Na gɩ ye sǝba ntǝma, gʊna TSASKƐ Stɛfani a cam ka ʊwǝlǝ asala bɛrɛ baŋunii. Gani kaŋkǝm na gɩ sǝba abʊtʊrka. Gɩ lee atǝma tuutuuma, k’ɩ lal na abʊtʊrka kanɖǝnɖǝn na. Ntǝma nɖe nɩ na gɩ ɖa, na baŋono GƆMƆ I. Yaakubu Sarabaa na ABDULAƖ Nasɛɛr, ɩkrǝ kaŋyɩɩ kʊceu kanɖiyar, ba jeɖe atʊ. Bɛrɛ banyɩʊ baɖe bʊjeɖu nɩ, ba ɖʊ atʊ pɩ ɩkashɩ naa naa kʊma atʊ ashee ntǝma nɖee gɩ na lee na shee atɩgɩkrǝ anii ma.

Formation_ressponssables_2
Ʊŋono GƆMƆ I. Yaakubu Sarabaa a jeɖe atʊ

Gɩshilikɔnɔ na gɩ man ace atɩ jɩ ʊjɩʊ, naa akɔɔ pɩ atɩ tǝwǝ ntǝma halɩ gɩteŋshile bʊkɔŋkɔŋɔ bʊnʊn. Gaja ga pêle koŋkaarɩ. Ɩ kɔɔ lee tam afɔlɩ.

Ʊyɔʊcamka kaŋkulo
Ʊyɔʊcamka kaŋkulo
Nuhum BABA BƆƉƖ SAALIFU

Laisser un commentaire