Atɩkrǝ Togoo na Benɛɛ kʊwalʊ Kàraa 2014

Gakoloŋ gaja 2014 kaŋɔrɔ 8 kaja kɩshilé 5, 6 na 7 n’ɩkrǝ Togoo na Benɛɛ kʊwalʊ ʊ lee Kàraa SIL kaafala gabʊmbɔnɔ nɩ. Ɩkrǝ kantǝma kaɖi baja ba wala ka alee faawɩɩ ashee ɩkrǝ kaŋyɩɩ kʊceu. Atɩgɩkrǝ anii kʊla laŋ, amʊ n’ʊŋono Nasɛɛr ɩkrǝ kʊŋono kɔmin nɩ, gɩ ce ka.

Ʊwalʊ kanɖi njɩ gǝŋ wàà « Ʊŋɔn n’ʊtʊr kaaŋfaanɩ atǝbʊɖu ». Bɛrɛɩ ba lee ʊwalʊ ɖe kakoŋkaarɩ ma, ba kʊɖa kʊɖa bʊlei ashee atʊ naa afaŋa atʊ ɖaa gɩ lêe naa ʊŋɔn n’ʊtʊr kaalei ga sâra gɩshɛbʊ ma.

Koŋkaarɩ nɖee baa aŋa a na lee agaɖu ma, a laa afaŋa. Amʊ n laa afaŋa ɖaa ataGʊGʊ kantǝma n na sara halɩ gɩ bôŋo aɖoo na ma ashee bɛrɛ ba tʊ̂r ma.

Hakiimu a yiɖe ŋyɩɩ na lee GʊGʊ afaawɩɩ
Hakiimu a yiɖe ŋyɩɩ na lee GʊGʊ afaawɩɩ

Bɛrɛ baŋuniiɩ ba ɖa ŋku ŋkǝŋ ma, ba kʊma atɩntǝma naa akʊma ataGʊGʊ ɖe. Ba lǝ wàà, atɩgɩkrǝ anii gɩ ɖa ŋyɩɩ kʊceu kʊnyɩŋca laŋ boŋo. Ɩ lee ʊciŋkǝrka ashee atʊ páá.

Gaja ga shêe atʊ ɩkashɩ gɩ sǝ̂ra atoŋo n’atɩgɩkrǝ kantǝma ! Gaja ga pâla atɩgɩkrǝ anii kapá ɩŋunii ɩ tɔ̂ɔ koŋkaarɩ ashee atɩgɩkrǝ kaŋyɩɩ kʊceu ! Gaja ga shêe atʊ ganɔ gaɖɔŋkɔnɔ ! Ami.

Hakiimu ATI KALAM

Laisser un commentaire