Ʊŋono Jeneral Abaasɩ akoŋkaarɩ

Atǝbana, atǝbaya,

ɩkaracɩ baɖǝn ba tɩ lee koŋkaarɩ na shee atɩgɩkrǝ kaŋyɩɩ kʊceu. Gɩ sɔlɔ gboo wàà, atabaamʊnʊ nɩ, gɩ naa ɖʊ pɩ ncǝn. Laŋ na gɩ ŋɔn blɔg nɖe na lǝ ɖaa ʊŋono Jeneral Abaasɩ a lee koŋkaarɩ ɖǝn ma. Akoŋkaarɩ na gǝŋ wàà, a ŋɔn ayɔkɔ kayɩɖa n’atɩgɩkrǝ anii : bʊto nɩ kayɔkɔ, gatǝna laŋ kɩja, bʊsapɩ́, ɩbɔrɩ baŋɔnja, ɩbɔrɩ bafalɩja, ayó n’aŋɔ, bʊkɔɩ, bʊɖu, ɩtam, ashi, akǝma na ɖooɖooɖo kɩjɩʊ …

Ʊŋono Jeneral Abaasɩ
Ʊŋono Jeneral Abaasɩ

Gɩ wa na nɩ ma, n’a kɔɔ n’ayɔkɔ ɖe kayɩɖa kpataa ashee atʊ wàà, gɩ ɖʊ̂ bʊlinyaʊka na kɩmaana kambʊpa nɩ [Dictionnaire].

Gɩ kʊma ataya ɖe páá ; aɖʊwaa atakɔmin kɩkaracɩ ba kpa atɩgɩkrǝ kakoŋkaarɩ nɩ ma, ɩ lee ʊciŋkǝrka ʊbʊmbɔnɔ ashee atʊ. Gaja ga pâla atɩgɩkrǝ gɩ cǝ̂ ŋyɩɩ awu ɖaa gaɖuɩ gɩ lee akpa boŋo wáá ma !

Hakiimu ATI KALAM

Laisser un commentaire