Martɛɛŋ n’akar Stɛfani bʊmanʊ kʊkpeɖu

Afɔnɔ ‘aŋɔrɔ 7 kaja nɩ, gaja 2014 na Martɛɛŋ n’akar Stɛfani ba kpeɖe na ce Jaama. Ntǝma n taa pɩ Bashɩɖɩ na ce na ŋkǝŋ. Aŋɔrɔ ɖe ‘ʊshilé 26 kʊja na ba ta Bashɩɖɩ ; ɩɖe tɩ lee asiibi kʊshilé na gǝŋ. Amʊ Hakiimu n yala ka pɩ halɩ Kʊtɔnʊ.

Gɩ kpa Kʊtɔnʊ gaja ga kʊɖa alahaɖɩ ma, na gɩ ŋʊra. Aɖɩtɛnɛɛ aŋɔrɔ ‘ʊshilé 28 kʊja na ba nǝ ba tɔ̂ɔ alepree ; Jɩŋgaarɩ ajala kʊshilé na gǝŋ. Gɩ sala Iɖi aboŋo ma, n’atʊga n’akar ba kɔɔ na ntǝma kabaamʊ aɖʊ aŋgʊnyɛ nɩ. Gɩ boŋo ma, na gɩ man ajɩ ʊjɩʊ. Ʊjɩʊ kaŋkǝma na ba yɛɛ lɔɔrɩ na gɩ ɖoo ayeeyee Kʊtɔnʊ mpá nɩ cei naa aye kɔɔ pɩ atɩ boŋo bʊkɔɩ bʊ saa ma, akpeɖe.

Gɩteŋshile laŋ fìrìfìrì na n yala pɩ ace alepree katɩɩsan. Alepree k’a kana ta na, n’amʊ n tǝbǝ tɩɩsan ŋkǝŋ. Alepree a tɩ́ na yɛɛ a tâ ma, na Stɛfani a pala n yɔ. Ba rgǝ Gajaamatǝna nɩ ma, na Stɛfani ashee amʊ laabaarʊ wàà, baɖe ba kpa alaafɩya.

Alepree katɩɩsan Faraŋshɩ kaatǝna nɩ
Alepree katɩɩsan Faraŋshɩ kaatǝna nɩ

Ɩshilé ɩriu nɩ amʊ n kɔɔ lee Kʊtɔnʊ acǝŋǝ ; naa aboŋo atǝma nɖee ɩ saa ma, akǝrǝkǝrǝ. Aŋɔrɔ 8 kaja ‘ʊshilé 1 na n kɔɔ kpa Bashɩɖɩ ; ɩɖe tɩ lee atǝgatǝna Benɛɛ kagʊlʊcamka kajɩŋgaarɩ kʊshilé na gǝŋ.

Martɛɛŋ n’akar Stɛfani ba tǝ ba lêe gaja gapǝlmǝ naa aye kɔɔ pɩ Bashɩɖɩ. Gaja ga pâla gɩ kɔɔ wâ n’alaafɩya !

Hakiimu ATI KALAM

Laisser un commentaire