GʊGʊ kaɖi baja ba jeɖe Miniisǝr AFO IƉIRIISU Safiu

TSASKƐ Stɛfani na TSASKƐ Martɛɛŋ na Miniisǝr AFO IƉIRIISU
TSASKƐ Stɛfani na TSASKƐ Martɛɛŋ na Miniisǝr AFO IƉIRIISU

Yofo ‘aŋɔrɔ anʊntaja ʊshilé akoo-na-ganaana kʊja gaja kotoku-banyɩʊ-na-tǝb-n’ɩnan, ʊ lee ka ʊshilé nɖee atɩga TSASKƐ Martɛɛŋ n’akar Stɛfani ba ce atɩ jeɖe Miniisǝr AFO Safiu ma. Bʊkɔ mbʊɖee bʊ pala ba ce atɩ jeɖe nɩ ma na gǝŋ wàà, tam nɖee Penesul kagʊsaʊ kapá ɩ na lee bɩwalʊ ma, atʊ, GʊGʊ kaŋkulo, gɩ jeɖe ɩwalʊ ɖe ɩŋunii. Ŋkǝŋ na gɩ wa na Miniisǝr abakǝŋja ba ce ɩwalʊ na Miniisǝr aganɔ ma.

Ŋkǝŋ na gɩ ŋǝ wàà, Miniisǝr a tɩ yɛɛ gɩkrǝ anii kaŋyɩɩ kʊceu. Gɩ kpa ma, na gɩ lǝ ashee atɩga baɖe. Ba ce Kʊtɔnʊ ma, na ba lǝ wàà, baɖe ba tǝ ba jêɖe nɩ. Na Miniisǝr a lǝ wàà, bʊkɔŋkɔŋɔ cɩɩnɩ gajaka ba pɩ̂ aɖe agatǝnleeɖu. Ba kpa ma, atʊŋono ɖe a cɔɔ cam pɩ gɩshɛbʊ.

Ŋkǝŋ na atɩga ba laa anii kabʊpa gɩ na lee atǝgatǝnleeɖu ma, afaŋa nɩ. Aɖe gboo ‘ʊcine ʊ ta kǝr n’atɩga ashee ntǝma nɖee ba na lee na shee atɩgɩkrǝ anii ma. Bʊceu ɖe ŋkǝŋ, ba ce na ŋkulo kansala ashee nɩ. Gɩ tɩ sala nɩ ; aɖʊwaa ɩkaracɩ ba ta tɩ ŋǝ̂ akoɖǝn kabʊcǝma naa atɔɔ bagʊlɔ aɖʊ ncǝn, ʊciŋkǝrka na ashee bɛrɛɩ ba na lee bʊkɔ bʊɖe ma.

Gɩ tɩ nyiŋǝ ɩkaracɩ baŋunii ba lee Anii kǝbapi ma, ba pala gɩ lêe ganɔ gaɖɔŋkɔnɔ ashee atɩgɩkrǝ kaŋyɩɩ kʊceu aɖʊwaa ba lee ka bɛrɛɩ ba naa sǝra alǝ naa ɩ lee ma.

Rahaman ƖSA ASIS

Laisser un commentaire