Gaja kotoku banyɩʊ-n’akoo-n’ɩriu afɔ́nɔ̀ ‘aŋɔrɔ akolontaja nɩ na LIŊGO-BENƐƐ kaŋkulo n ɖoo a ce SE ƐR PEE (CRP) sul. Ɩɖe tɩ lee atɩsukuru bajala kǝbafaŋaka banɖiyar na gǝŋ.
Gɩ ce atɩ taba pɩ ganɔ ashee atɩgɩkrǝ anii kʊfaŋʊ atɩsukuru bajala nɩ. Gɩ kpa ma, gɩ ŋǝ SE ƐR PEE n’abakǝŋja. Ba cam atʊ gɩshɛbʊ na gɩ tɔɔ ŋgaɖee ga pɩ n’atʊ ma, alǝ ashee pɩ. Ɩ san na pɩ ɖaa gɩ na yɛɛ gɩ sǝ̂ba atɩgɩkrǝ kʊfaŋʊ atɩsukuru bajala nɩ ma. Ŋkǝŋ na a shee atʊ ganɔ wàà, gɩ tɩ gɩ sǝ̂ra ace atɩ na faŋa bapi atɩgɩkrǝ anii atɩsukuru bajala nɩ.
Na gɩ sǝba atɩ ɖʊ galei gaɖe atǝbafaŋaka batɔ nɩ na bafaŋaka ba kɔɔ shee atʊ ganɔ wàà, gɩ pɩ̂ atɩ lǝ ashee sukuru kǝbapi. Na gɩ ce atɩ wala bapi sukuru gɩcɩɩca kaja nɩ, naa alǝ pɩ niya nɖee gɩ na tɔɔ ma.
Bapi ba kɔɔ kpa sukuru ma, na gɩ màna sǝba ʊfaŋʊ gboo. Ɩɖe tɩ lee Bashɩɖɩ kasukuru gɩcɩɩca kaja nɩ na gɩ sǝba ʊfaŋʊ naɩ. Gɩ ta tɔɔ ɖaa Bayaakʊ, Ɖɛɛŋʊ na Agerenɖebu ma, gɩ sǝba na faŋa atɩgɩkrǝ sukuru bajala baɖe nɩ gboo bɔkɔɩ baa apaŋa na.
Gɩ ŋǝ wàà, bapi ba sɔlɔ bagɩkrǝ, aɖʊwaa gɩ tɩ ŋǝ pɩ na faŋa gɩshɛbʊ. Ama ka gɩ sǝra atǝ ɩsukuru baŋunii nɩ na, ataniya na wàà, bʊja bʊfɔlɩ nɩ anii kʊfaŋʊ ʊ sǝ̂ra atǝ anii kɩsukuru baŋunii nɩ.
