Bapigii Japaŋ kǝbaja bʊjeɖu

Atǝbasoro Japaŋ kǝbaja ba pɩ atɩ jeɖe atʊ SIL kaatǝnleeɖu. Bapigii pɩ ; OMAYƐ Yoshimi (ÔMAYE Yoshimi) a na lee ntǝma Karɖɛr Bashɩɖɩ ma, na Aya KORIYAMA Penesul.

Ba kpa na gɩ cam pɩ afaŋa bʊɖu ma, n’atʊsoro ATI KALAM Hakiimu a kaŋa na pɩ atʊr abɔ ɖǝn. Ba tʊr cei ma, na ba shɩ abʊpá ɩtʊrka nɖee ɩ ɖa n’atʊ ma ɩŋunii gɩɖǝnɖǝn, na gaja kɩŋɔrɔ kabɔ. Ba boŋo ma, na ba jɩ ʊjɩʊ naa asǝ aŋʊra.

Ɩ lee cei ma, n’amʊ na pɩ gɩ tʊr abɔ ɩnyɩʊ ɖǝn ; ɩni nɩ gǝŋ “Awaryɔkɔ” na “Mʊ nʊ a na cere ?” Awaryɔkɔ kambʊpá nɩ, gɩ tʊr “kɔrɔgɔtɔ” ncǝn ; kǝ ba yɔ kabʊkɔ na ma, na ʊŋono Umooru atawacǝman ɖǝn a ce atɩ tɔɔ afaŋa pɩ naa akʊɖa bʊkɔ́ɩ ba na lee na ma na ma ashee pɩ na gɩ ye boŋo atǝwǝ atʊtʊr abɔ ɩnyɩʊ ɖe nɩ.

Bapigii Japaŋ kǝbaja baɖe ʊtʊr katam
Bapigii Japaŋ kǝbaja baɖe ʊtʊr katam

Bapigii baɖe ba sǝ n’atʊ alǝŋ. Ʊshilè ʊ na ci ma, na ba kpeɖe. Ba na shɛʊ ma, na Penesul kaja a shɩ gaas na kabʊyɔkɔɩ bʊ na ɖa na ma na ma. N’atɩŋkulo nɩ kʊsoro ba na yɩɖa wàà, Kariimu a na lee seemija kantǝma ma, a toŋo ace na lɔɔrɩ kaamana, naa ayɛɛ nɖee a kpâ ma, a saa na nɩ. Ɩ lee cei ma, n’aɖe gboo a tǝr n’akɛkɛ ace lɔɔrɩ sul atɩ kpa ashɛʊ, n »anyɩʊtaja gboo a shɛʊ agaɖufal.

Gaja ga tɩ̂ pɩ alaafɩya, alama baŋuro naa ashee pɩ ɩkashɩ nɖee ba lêe na ntǝma ma.

Mʊstafa ISIFU SƱMAANƱ

 

 

 

 

 

 

Laisser un commentaire