Gʊyà Aciibaa anyɩʊtaja abasǝmprǝ ba pɩ atɩ jeɖe atʊ SIL kaatǝnleeɖu

Aɖɩtɛnɛɛ afɔnɔ ‘aŋɔrɔ asǝbaka ‘ʊshilé tǝb-n’ʊɖǝn kʊja, gaja kotoku-banyɩʊ-na-tǝb-n’ɩkolom na gʊyà Aciibaa anyɩʊtaja abasǝmprǝ ba pɩ atɩ jeɖe atʊ SIL kaatǝnleeɖu.

Bʊkɔ́ɩ laŋ ba pɩ SIL kaatǝnleeɖu ma na wàà, ʊwalʊ kasáà, baɖe ba ŋǝ SIL kanɖiyar Martɛɛŋ a toŋo ɩpɛ na cim ma. Aɖʊwaa ɖoo tam nɖee a ɖa Bashɩɖɩ ma, kǝ ba na ŋǝ na nɩ ɩpɛ na. Na SIL kanɖiyar a na lǝ pɩ wàà, ɩɩŋ ! Ɩja nɩ, aɖe k’a fǝɖa na, gɩŋono gɩ na kpa na shee aɖe.

Gaɖuu basǝmprǝ baɖe ba lǝ wàà, baɖe ba tɩ yɛɛ ba fâŋa atʊ ɖooɖooɖo kacǝma, naa naa lǝ aɖi baja wàà, baɖe ba tɩ yɛɛ ba naa cere anii kʊŋɔn na kʊtʊr. Galaŋ ba lêe koŋkaarɩ ashee baɖe. Na gɩ ye ɖoo aka, na ba sǝba ɖooɖooɖo katulo, na kǝɖa anyɛ na rɩ n’acǝma. Ɩ ta san aɖa aiɖoo.

Ba faŋa atʊ ɖooɖooɖo kacǝma

Ŋkǝŋ n’atana Kpeinyaa a na lǝ wàà, ɖooɖooɖo tam nɖee baɖe ba ɖa gɩjala ma, aŋɔrɔ a ta naa kǝ̂r, gǝŋci baɖe ba na cǝr halɩ ɩ tɩ cim sáà nɖee baɖe ba ɖâ atǝn ma. Ɩ ta jɩ̂ wàà, ʊ wʊɖa gɩkɔbɩ kaŋkǝlǝ́ njɩ ʊ na ce akakɔbɩ sul. Ama, nnyǝmǝ kǝbapigii ba na ta kpaarɩ ma, babakɔbɩ babʊɖu bʊ ba na fol. Gʊcǝrá ka gʊ kɔɔ ɖa na.

Nnyǝmǝ GʊGʊ kaŋkulo n tɩ faŋa ɖaa n lee naa atoŋo ɖooɖooɖo kaleu ɖe ashee atǝbapi saamaanɩ nɖe nɩ ma.

Aŋɔnka : BABA BƆƉƖ Rafɩyatu

Laisser un commentaire