Ʊlampǝl kʊwalʊ Alaafɩya 2016

Asiibi afɔnɔ ‘aŋɔrɔ anyɩʊtaja ‘ʊshilé ʊkolontaja gaja 2016, na gɩ ce Ʊlampǝl kʊwalʊ.

Atʊkpaʊ ŋkǝŋ, na gɩ ce atɩ ŋǝ ʊŋono Kariimu na gɩ man ace abʊpá kaafala nɩ. Ŋkǝŋ na gɩ ta na ma ace bʊwalʊ kaaɖu.

Gɩ kpa ŋkǝŋ ma, n’ʊŋono ba na yɩɖa wàà, KIƉE MOKAFO Mʊɖashiiru ma, a cam atʊ naa afaŋa atʊ gaɖusǝka gɩ sǝ. Anaŋa ɩtʊrka kaŋkǝm na AFO TƐNƐ Rubatu n’abaja Jaama kǝbaja gboo ba kpa, na gɩ sala.

K’ɩ lǝŋ na n’ʊwalʊ kaɖi baja ba sǝba ʊkpaʊ, arɛ̀ɩ a boŋo akpa naa ba sǝba ʊwalʊ ma na gǝŋ, Prefee. A kpa kpaarɩ ma, na ba shee Ʊlampǝl kalimaamʊ abʊmbɔnɔ ʊwǝlǝ a ɖoo gɩcɩɩca atine ʊwalʊ n’ʊnyiŋu. ‘Ʊnyiŋu nɩ, a nyiŋǝ ashee Ʊlampǝl kampá na Togoo kaatǝna gaŋunii n’apá nɖee ɩ sir Togoo akal ma, na ɖulinya aŋunii gboo. A boŋo ma, na Prefee gboo a ɖoo a sala bɛrɛ naa alǝ wàà, Ʊlampǝl kampá kaŋyɩɩ kʊceu ʊ lee aɖe agalei jɩ, galaŋ Ʊlampǝl kʊpi baa apaŋa na a ta ayiɖe ashee ampá kaŋyɩɩ kʊceu. A boŋo ma, na baMiniisǝr a ɖoo a lee ajafaawɩɩ.

Ba kǝ acǝma asʊ̀rá asʊ̀rá, ɩɖǝn ɩ ta ta bɛrɛ laŋ. Ba boɖo ɩgagalo, afʊ bʊpɔɔ, acim ɩtɔɔrɔ, akǝ takaɩ na nɖee ɩ saa ma…

Na ce ʊboŋu nɩ na ba shee atʊ ʊwǝlǝ gɩ ɖoo gɩcɩɩca alee faawɩɩ nɖee gɩ toŋo ma, gɩ sala Ʊlampǝl kasamaa nɖee a ɖoo ʊwalʊ nɩ ŋkǝŋ ma, naa alǝ pɩ koŋkaarɩ nɖee SIL Bashɩɖɩ a na lee na shee atɩgɩkrǝ anii Togoo na Benɛɛ ma. Gɩ faŋa pɩ atabɔ nɖee gɩ toŋo ace na ŋkǝŋ ma, naa ashee pɩ bʊbʊkǝli bʊjala mbʊɖee laŋ ba sǝ̂ra na lo WasAp ma.

Atɩŋkulo Ʊlampǝl kʊwalʊ gakoloŋ

Bʊwalʊ ʊ san páá, ba shɩ atabɔ halɩ atɩcine ɩ kǝr na bʊwalʊ. Gaja ga kpâ n’atʊ ʊwalʊ ʊfɔlɩ.

Malookiya IBRAHIM INUUSA

Laisser un commentaire