Jaama kǝbapigii ba ɖa Ʊlampǝl ma, bʊjeɖu

Ʊrɔŋ atalaata, afɔnɔ ‘aŋɔrɔ anyɩʊtaja ‘ʊshilé akoo-n’ɩriu kʊja, gaja kotoku-banyɩʊ-na-tǝb-n’ɩkolom na bapigii baɖe ba pɩ. Bayɩɖa nɩ gǝŋ : WAƖKSƐLBAƱM Lisa [WEICHSELBAUM Lisa] a ɖoo na Jaama apɩ gɩfɔlɩ Ʊlampǝl kabʊpá kaafala nɩ atɩ na lee ntǝma ma, na GLƎKLƐR Lena [GLÖCKLER Lena] Jaama kaja gboo a bʊŋa lee ntǝma abɔ kaafala gaɖe nɩ ma ; ama, k’a cee yɔ atɩya SIL kaatǝnleeɖu Bashɩɖɩ na.

GʊGʊ kaŋkulo na Ʊlampǝl kǝbapigii.
GʊGʊ kaŋkulo na Ʊlampǝl kǝbapigii.

‘Anyɩʊtaja asaná a cee pɩ atɩ yɔ gaɖu boŋo, na ba kʊn bawor apɩ gǝŋ. Ba kpa ma, na gɩ cam pɩ gɩshɛbʊ, afaŋa pɩ bʊɖuɩ gɩ na lee atǝma ma. Gɩ boŋo ma, na ba jɩ ʊjɩʊ naa asǝ aŋʊra. Ɩ lee cei ma, na ba man asǝ n’atʊ anyaʊ GʊGʊ cɩɩnɩ na tǝb kaja naa aye lee faawɩɩ cei n’atana Stɛfani. Batakukuyar a kpa ma, na ba shɛʊ. Gaja ga tɩ̂ pɩ alaafɩya.

Mʊstafa ISIFU SƱMAANƱ

Laisser un commentaire