Bashɩɖɩ kʊwalʊ bʊja ɩshɩnyɩʊ kʊja gaja 2014

Arɩsǝma afɔnɔ ‘aŋɔrɔ tǝb-n’ɩnyɩʊ kaja ‘ɩshilé akoo-n’ɩkolom kʊja ʊ lee ka ʊshilé nɖee ba tine atʊwalʊ bʊja ɩshɩnyɩʊ kʊja ma. Naɩ naa ʊwalʊ ɖe ʊ sǝ̂ba, Bashɩɖɩ kalimaamʊ abʊmbɔnɔ a sǝba ka acam ʊwǝlǝ anyiŋǝ ashee Bashɩɖɩ kʊpi baa apaŋa na a ɖa ɖulinya kɩla ɩŋunii nɩ ma, na mbaɖee ba ɖa atǝgatǝna Benɛɛ nɩ na Bashɩɖɩ kɩkarakara nɩ atɩya ma.

‘Ʊnyiŋu kaŋkǝm na Bashɩɖɩ kagʊpayarɩ Aciibaa 2ja gboo a cam ʊwǝlǝ a sala bɛrɛ mbaɖee ba sǝra aɖoo ʊwalʊ ɖe ma, na mbaɖee ba wʊɖa niya na yɛɛ ba ɖôo kǝ ba sǝra aɖoo na ma. Na mbaɖee ba wʊɖa niya naa kǝ ba sǝra apɩ na ma. Bɛrɛ banyɩʊ baɖe baŋkǝm na Ɩsa JAŊKPATA a cam ʊwǝlǝ na Bashɩɖɩ kaMɛɛr aganɔ naa asala samaa aŋunii kpataa naa alǝ aŋfaanɩ nɖee Bashɩɖɩ a ŋǝ bʊja ɩshɩnyɩʊ ɖe ma, na bʊkɔ́ɩ ataMɛɛrii a lee Bashɩɖɩ kakɔmin nɩ ma.

A boŋo afaawɩɩ ma, na baa aŋa na a kɔɔ shɛʊ agafala nɩ atɩ ce sǝmaa. Ɩ kǝ bʊkɔŋkɔŋɔ̀ bʊriu na gʊsaʊ ma, na bɛrɛ ba kɔɔ kpa ; n’ʊwalʊ ʊ tǝwǝ halɩ gɩjibɔŋɔ.Aɖʊwaa ʊwalʊ ɖe, ʊ wala Bashɩɖɩ kǝbapi mbaɖee ba ɖa ɖulinya aŋunii nɩ ma na, na bʊpapiri mbʊɖee bʊ sǝr Bashɩɖɩ akal ma, Togoo na Benɛɛ.

Atʊ SIL kaŋkulo gɩ ɖoo gɩcɩɩca afaŋa bɛrɛ abɔ nɖee ɩ ɖa ʊtʊr n’atɩgɩkrǝ anii ma. Naa ayala abɔ ɖe ashee pɩ. Kaŋkǝm na gɩ yʊga bʊbʊkǝli bʊjala mbʊɖee bʊ pâla ba sǝ̂ra na ŋǝ SIL ‘ɩlaabaarʊ n’abʊpá ɩŋunii nɖee gɩ wʊɖa ma, ɛntɛrnɛɛtɩ nɩ. Bashɩɖɩ kǝbapi mbaɖee ba ɖa bʊtǝna bʊfɔlɩ nɩ na mbaɖee ba ɖa Benɛɛ nɩ ma, ba pɩ na bʊkɔ́ɩ mbʊɖee ba sǝ̂ra akaŋa na mpá ma. Aɖʊwaa ba sɔlɔ atɩmpá Bashɩɖɩ kaŋyɩɩ kʊceu na kabʊcǝma.

Ʊwalʊ ɖe ʊ san, aɖʊr afǝlǝ na bʊja bʊsaaka. Naa alee ʊciŋkǝrka ashee anii kʊpi baa paŋa na. Gaja ga kpa n’atʊ gajɩfɔlɩ 2015.

Malookiya IBRAHIM INUUSA

Laisser un commentaire