Bayarɩ bʊwalʊ Penesul 2016

Asiibi afɔnɔ ‘aŋɔrɔ tǝb n’ɩnyɩʊ kaja ‘ʊshilé akoo-n’ɩnan kʊja na bayarɩ ba lee bʊwalʊ akpala cɩɩnɩ kʊja.

Asiibi ɖe bayarɩ baɖǝn ba kpa Penesul ma, na ba sǝ asaa bawor mbaɖee ba saa ma. Bani ba kpa ma, na ba man akʊn bawor ace gʊpenesulyarɩ agʊyarɩcɩncaŋa nɩ. Ba wala bawor anyiŋǝ Gaja ashee Penesul kampá n’atǝgatǝna Benɛɛ, naa aye lee ashilé nɖee ɩ ɖa ʊleu ashee bayarɩ ma. Bagǝŋgǝŋǝkǝja baɖe ba tɩ sheeshee pɩ na bɩtaakɩ. Ba ɖoo gayarɩfala nɩ ma, na ba ye pɩ gaɖu ŋgaɖee ba laa ashee bayarɩ bʊwalʊ ma, ɩɖe tɩ lee Penesul kasukuru ajala nɩ.

Arɛ̀ɩ a sǝba atine bayarɩ bʊwalʊ ɖe ma na gǝŋ, atʊŋono TAASƱ SAKARƖ Sulkifilu, anii kǝbayarɩ ‘bakalkanama. Afaawɩɩ nɩ, a nyiŋǝ ashee ataya Sarabaa a yɛɛ ŋŋuro afar ma, naa akʊɖa bʊkɔ́ɩ bʊ wala bɛrɛ Penesul ŋkǝŋ ma. A sala jamaa nɖee a sǝra aɖoo ŋkǝŋ ma, na mbaɖee ba wʊɖa niya na kǝ ba sǝra apɩ na ma, n’anii kǝbayarɩ baganɔ.

Ʊni aŋkǝm ba shee bɛrɛ tuutuuma ganɔ ba ɖoo alee bɩfaawɩɩ. Kʊɖǝn na gǝŋ ɖaa ataMɛɛr aŋono ma, ATA SAALIFU Amiiɖu. Afaawɩɩ kaŋkǝm ba lee nɩ gʊjɔɔ.

Bɛrɛ batʊrka baŋkǝm kpaarɩ na ba yɩɖa atʊ GʊGʊ kaŋkulo, na gɩ ɖoo gɩcɩɩca akʊɖa atafaawɩɩ nɖee gɩ wʊɖa ma, ashee jamaa nɖee a sǝ atǝn ma. Ʊshilé ɖe gboo na gɩ tine atakɔ́lɩ kasitwɛb afɔlɩ afaŋa bɛrɛ gbagbaraa, banna WasAp kɩja gɩ cee na togo ma.

Ʊwalʊ ɖe nɩ na ba shee bɛrɛ mbaɖee ba jɩ apǝrǝ kacaacaa ma, bagʊjɔɔ ; na bapi mbaɖee ba jɩ ayɔkɔlaaka [dessin] kacaacaa gboo ma, bagʊjɔɔ. Ɩ san na bɛrɛ baɖe baŋunii ashee gʊjɔɔ gʊɖe ba ŋǝ ma.

Atʊ GʊGʊ kaŋkulo gɩ yala akɔ́lɩ kabɔ n’abʊpá ɩfɔlɩ nɖee gɩ toŋo ace na ŋkǝŋ ma. Bɛrɛ tuutuuma ba ce ka ʊwalʊ ɖe ; bʊɖǝn k’a lee nshɩŋyɔ na, aɖʊwaa ʊwalʊ ʊ san páá. Gaja ga kpâ n’atʊ gajɩfɔlɩ naa alee batɔnɔka gaafara !

GʊGʊ kaŋkulo n tɩ faŋa akɔ́lɩ kasitwɛb revue-gugu.org/proverbes

https://revue-gugu.org/proverbes/

Malookiya IBRAHIM INUUSA

Laisser un commentaire