Ʊyɛʊ kaŋkulo kʊwalʊ tǝb-n’ɩkolom kʊja

Asiibi afɔnɔ ‘aŋɔrɔ tǝb kaja ‘ʊshilé ganaana kʊja na gɩ lee ʊwalʊ tǝb-n’ɩkolom kʊja. Ʊwalʊ ɖe nɩ, gɩ lee ayɔkɔ tuutuuma. Kancǝn na gɩ laa nɖee gɩ na yɛɛ gɩ kʊ̂ɖa ashee anyɩn wáá ma. Atʊwalʊ ɖe nɩ, gɩ lee anii kaɖaɖaa kayɩɖa ɖaa baŋono ba bʊŋa na ɖʊ babapi ayɩɖa ma. Gɩ lee ayɩɖa nɖee gɩ na lo apǝrǝ nɩ ma, n’ayɔkɔ asʊ̀rá tuutuuma ɩfɔlɩ.

Gɩ walawala mbaɖee apǝrǝ ɩ na ri ma

Kancǝn na gɩ na kʊɖa mbaɖee apǝrǝ ɩ na ri ma, na shee anyɩn. Ayɩɖa ɖe kɩɖǝn nɩ gǝŋ ɖaa : caca, gbanfolo, ŋkʊnakʊna… na garomo ma.

Ɩ tɩɩ ŋǝ̂ wàà, apǝrǝ tuutuuma ba na cǝ ma, alʊkɔ ɖe ɩ na ɖa ncǝn. Alʊkɔ ɖe gboo gɩ tam wáá ma, baa bʊlʊkɔ bʊ paŋa bʊ bʊ wʊɖa bʊkɔ́ɩ bʊ na lee mpǝrǝ baa mpaŋa nɩ ma. Ʊkɛɛshɩɩ: Gɩ ta tɔɔ ɖaa caca ma, a na lee ayɔɩ na k’a na jɩ gɩjore ɖaa ɩbɔrɩ basaaka ma na. Kagʊsʊ̀rá kʊ garomo gboo. Apala ŋkʊnakʊna na gacikori na gbanfolo na gɩ ŋǝ ba tɩ lee ʊjoruleu apǝrǝ ɩɖǝn nɩ.

Malookiya IBRAHIM INUUSA

Laisser un commentaire