Japaŋ kayifala ɖǝn a cere atɩgɩkrǝ Kʊtɔnʊ

Amʊ na Arushi
Amʊ na Arushi

Ɩgbɛ ɖǝn a ɖa Kʊtɔnʊ ashee ɩkrǝ ɩfaŋaka ma, a yɩɖa amʊ n ce Kʊtɔnʊ atɩ faŋa Japaŋ kayifala ɖǝn ba na yɩɖa wàà, Arushi ma, atɩgɩkrǝ anii. Arɛ̀ɩ ɩgbɛ ɖe a kul na ma naa ayɩɖa amʊ ma, ʊni na gǝŋ atʊsoro Aɖamʊ alǝlǝja raaɖiyoo O-Ɛr-Te-Bee Kʊtɔnʊ.

Amʊ na nɩ gɩ lee ka ntǝma nɖe ɩshilé ganaana. Tɔɔ n’aɖɩtɛnɛɛ afɔnɔ ‘aŋɔrɔ 7ja ‘ʊshilé 18ja halɩ atalaata aŋɔrɔ ɖe ‘ʊshilé 26ja. Mbʊpá ba na yɩɖa wàà, « J’apprends le anii au Bénin » ma, nni njɩ gɩ lee na ntǝma.

Ntǝma nɖee Arushi a na yɛɛ a lêe Benɛɛ nɩ ma, Boɖi na a na yɛɛ a sǝ̂. Bʊkɔ́ɩ a cere naa a ye kpâ Boɖi ma na gǝŋ : nsala, ayɔkɔ ɩɖǝn kayɩɖa, gakɔŋkɔŋɔ̀, bʊlei bʊja bʊɖǝn bʊ nʊʊ kâŋa na nɩ ɖaa a naa sǝba akpa asǝ Boɖi ma.

Gɩ boŋo ma, ba shee atʊ abɔ, Arushi a cam agʊja, atʊ gboo gɩ cam atɩja.

Hakiimu ATI KALAM

Laisser un commentaire