Anii kɩɩbii kagʊbɔ

Gɩ pɛmpɛŋɛ atɩɩbii kagʊbɔ, ɩ lee ʊciŋkǝrka ashee atʊ. Ɩŋono ɩ tɔɔ ɖaa bʊja tǝb-n’ɩriu ma, na ba ye shɩ ɩ aɖur. Ɩpi kotoku-banyɩʊ pɩ ba cee kǝ alaa katam ɖe. Nnyǝmǝ na ɩ bon, na gɩ pɛmpɛŋɛ kʊ aɖoo na ma na gɩfɔlɩ. Bʊkɔ́ɩ bʊ ɖa ncǝn ma na wàà, ayɔkɔ ɩɖǝn ɩ fʊba gʊlaŋ cei.

Gacalaɩ alaarba afɔnɔ ‘aŋɔrɔ tǝb-n’ʊɖǝn kaja ‘ʊshilé akoo-na-cɩɩnɩ kʊja na atʊga Martɛɛŋ a sǝ ŋyofotala laŋ akiɖe bʊɖu mbʊɖee bʊ sim gɩ fʊ̂ba apɛmpɛŋɛ ma, akara gʊnyɛ. Aɖʊwaa atʊŋɔn ʊ ce ŋyɩɩ, ʊ fʊba akɔɔ cǝm awu ɖoo kʊja, bʊlei bʊɖǝn nɩ. Ɖaa kanɖi laŋ gɩ cee ŋɔn wàà : “Anii kibii” ma, nnyǝmǝ ɩ pra “Anii kɩɩbii”, “asǝna” kaaɖu ga pra “asna”. Foto ʊpi kaaɖu kaja a cee lee kokoli ma, a fʊba.

Anii kɩɩbii kagʊbɔ
Anii kɩɩbii kagʊbɔ

Kaŋkǝm ɩ cee wʊɖa gbantolo mana pɩ, ama nnyǝmǝ akɔ́lɩ nɩ gɩ ɖʊ ŋkǝŋ.

Amʊ Mʊstafa n’amʊsoro Malookiya gɩ man ka asǝ asǝŋkir akɔ́lɩ nɖee ba ɖʊ kaŋkǝm ma, alaa atakɔ́lɩ nɖee gɩ na pɛmpɛŋɛ na togo na WasAp ma nɩ. Arɛ̀ a ta cêre ɩbii aboŋo, a taa sǝ̂ra sǝba n’ɩni ʊtʊr ʊsono.
Gɩ boŋo gʊŋunii kpataa ma, na ba togo Kparakʊ kpaarɩ ba kǝ alaa.

Lêe ma koŋkaarɩ ashɩ ɩbii kagʊbɔ gʊɖe naa ɩ yɔ̂ ʊŋɔn na kʊtʊr gɩshɛbʊ. Gaja ga ɖʊ̂ ɩkashɩ.

Mʊstafa ISIFU SƱMAANƱ

Laisser un commentaire