Atɩgɩkrǝ gɩ ce ŋyɩɩ

Ɖoo ɖaa bʊja ɩshinyɩʊ na kaŋkǝm ma na gǝŋ, Anii kǝbapi ba sǝba bagɩkrǝ kɩbobocɩka ma. Bʊja bʊɖe nɩ, atǝbaya baɖǝn ba lee koŋkaarɩ asǝba na ŋɔn atɩgɩkrǝ na ɖʊ abɔ nɩ. Bakoŋkaarɩ ɖe ba lee ma, a pala ka atɩgɩkrǝ gɩ ɖa ŋŋuro nɩ halɩ [ONG SIL] a pɩ tɩ́ kpa.

Ɖaa SIL ɖe a kpa ma, ntǝma mbʊmbɔnɔ njɩ a lee ashee anii kagɩkrǝ gɩɖe. A taa anii kagɩkrǝ àlaŋ, n’abʊpátʊrka tuutuuma nɖee a lee ma, n’ɩɖǝn acǝŋǝ ka gɩ sǝra atam na… A pala ʊrɔŋ wáá, anii kagɩkrǝ gɩ ce ŋyɩɩ awu ɩkrǝ ɩbʊmbɔnɔ ɩɖǝn nɖee kasamaa awu anii kaja ma. Bʊkɔ́ɩ SIL a lee ma, ɩkrǝ tuutuuma ɖǝn k’ɩ kana sǝra alee na. Aɖʊwaa anii kagɩkrǝ gɩ wʊɖa ŋkulo nɖǝn n na lee ʊwalʊ ɩŋɔrɔ ɩnyɩʊ n’ɩnyɩʊ baa ɩpaŋa nɩ na yɛɛ gɩkrǝ gɩɖe kaŋyɩɩ kʊceu ma.

Abʊpá tuutuuma ɩ ɖa ka atǝn ashee anii kǝbapi. Ɖabanna abʊpá ɩjala, gɩ wʊɖa ntʊrka ɖǝn mbʊmbɔnɔ gɩ na ɖoo na ma gboo baa sáà apaŋa ma [revue GʊGʊ]. Ncǝn na gɩ na ɖʊ ɩlaabaarʊ basoŋsono na shee Anii kasamaa.

Atabɔ ɖe ɩ ɖa ɛntɛrnɛɛtɩ nɩ, ɩ tɩɩ sǝ̂ra na ŋǝ ɩ ŋkǝŋ na tʊr gboo. Gɩ wʊɖa WasAp kaŋkulo na togo akɔ́lɩ ɩsoŋsono na shee bɛrɛ arɩsǝma baa apaŋa. Atǝbapal n’atǝbapi laŋ na gɩ na lee koŋkaarɩ naa ba ta tâ, ba sǝ̂ra atǝwǝ bʊkɔ́ɩ gɩ sǝba ma.

Malookiya IBRAHIM INUUSA

Laisser un commentaire