Balampǝla mbaɖee ba ɖa Lʊmɛ ma, ba lee atɩgɩkrǝ kʊwalʊ

Bʊja bʊnyɩnyɩʊ bʊ, Balampǝla ba na lee bʊwalʊ ba na yɩɖa wàà, « Fête Alafia » ma. Gakoloŋ, atɩŋkulo n wa n’ʊwalʊ ɖe kǝbaŋono bʊwalʊ nɩ na gɩ rǝŋǝ wàà, babaja baɖǝn ba ɖa Lʊmɛ.

Amʊ n’aŋkul TSASKƐ Martɛɛŋ, gɩ ce Lʊmɛ gaja 2018 kaŋɔrɔ 3ja nɩ ma, gɩ wa na Balampǝla kǝbaŋono baɖǝn. Gɩ lee na pɩ ɩfaawɩɩ gɩshɛbʊ na gɩ fʊbafʊba bʊlei ɖaa gɩ na lee naa anii kaɖaɖaa a pàá lî na ma. Na gɩ faŋafaŋa wàà, baɩ na gɩ lêe naa apɩ balahaɖɩ kʊwalʊ nɩ ?

Alahaɖɩ aŋɔrɔ 3ja ‘ʊshilé 4ja, gɩ sǝba ajeɖe Basǝɖa bʊwalʊ n’aye ce Balampǝla bʊja nɩ gboo ŋkǝlǝ Agoe. Gɩ kpa ŋkǝŋ bʊkɔŋkɔŋɔ̀ tǝb-n’ʊɖǝn ma, ba cam atʊ gɩsaná gɩshɛbʊ. Gɩ faŋa pɩ ayɔkɔ ɩŋunii nɖee ɩ ɖa n’anii kagɩkrǝ ma, na baɖǝn ba kpa biti. Ɩ san na pɩ páá.

Ʊwalʊ kanɖiyar ansala

Gɩ fʊbafʊba bʊlei gboo aɖʊwaa anii kapá ɩŋunii bʊlǝu ʊ fǝlǝ fǝlǝ, ama anii kagɩkrǝ kʊŋɔn ʊ lee ʊɖɔŋkɔnɔ na. Gɩ kɛɛshɩɩ gboo ɖaa baa gɩkrǝ gɩpaŋa jɩ gɩ wʊɖa ʊlǝu tuutuuma naa awʊɖa ʊŋɔn ʊɖɔŋkɔnɔ, ɖaa gɩfɔnɔ, gɩjaamakrǝ n’ɩŋgilɩshɩ ma.

Anii kɩɩbii kʊtʊr

Gɩ faŋa pɩ anii kɩɩbii ɩŋunii na gɩ tʊr abɔ ɩbʊmbɔnɔ ɩɖǝn. Ɩ san n’atʊ ɖaa gɩ ŋǝ wàà, bɛrɛ baɖǝn ba tʊr anii gɩshɛbʊ ɖaa ba cee yɔ ʊtʊr na ma. Baɖǝn ba shɩ abʊpá ɩɖǝn, na baɖǝn ba lǝ wàà, ba tɩ yɛɛ ataWasAp kakɔ́lɩ. Bʊkɔŋkɔŋɔ̀ bʊnyɩʊ kaŋkǝm na gɩ boŋo naa ashɛʊ. Ɩ lee ʊciŋkǝrka ashee atʊ ɖaa ʊwalʊ ɖe ʊ sara ma.

Stɛfani TSASKƐ

Laisser un commentaire