Asiibi afɔ́nɔ̀ ‘aŋɔrɔ anyɩʊtaja ‘ʊshilé ʊriutaja, gaja kotoku-banyɩʊ-na-tǝb-na-ganaana na Balampǝla ba wala bawor asǝ atǝn. Bagʊsǝtǝna kanɖi njɩ gǝŋ wàà, baɖe ba lǝ̂ afana, ayɛɛ mpá kaŋyɩɩ kʊceu. Bʊwalʊ kaŋyɩɖa njɩ gǝŋ « Alaafɩya ». Ŋyɩɖa nɖe nɩ, ɩla tuutuuma ɩ ɖa ka ncǝn. Gasǝbaka alaafɩya gʊlɔ nɩ, ʊciŋkǝrka, ʊɖaʊ fɛɛ….
Ʊwalʊ ɖe, bɛrɛ tuutuuma ba pɩ ka aɖoo na bʊtǝna bʊtǝna, n’apá apá apɩ. Gominantɩ abaja kǝbaɖǝn gboo ba pɩ atɩ kaŋa na pɩ asǝ atǝn alee ʊwalʊ. Bʊlinyaʊka nɩ, ba cam ʊwǝlǝ ma, naa naa lǝ samaa wàà, ʊba atǝma ɩleeka nɩ, ba nyaʊ Ʊlampǝl kɩpeli, n’ɩfǝtǝla kabʊlei. Atǝma ɖe, ɩ ɖa k’ɩ kɔɔ wʊɖa shika ɖǝn ashee Ʊlampǝl kampá na. Ŋgaɖee ga saa ʊnyaʊ ma na gǝŋ, logita kaaja. Ama galei gaɖe ga ɖa ʊba agʊnyɛ nɩ, ba ɖa na faŋa jɩ gboo.
Ʊwalʊ ɖe nɩ, ŋkulo nɖee n ɖa ashee anii kagɩkrǝ kaŋyɩɩ kʊceu ma, n ce atɩ faŋa bɛrɛ abɔ nɖee ɩ ɖa ʊtʊr ma, n’ɩcǝpǝrʊjala gɩ na yɩɖa na gɩfɔnɔ wàà, [Applis] ma. Gɩ wa na bɛrɛ, alee ɩfaawɩɩ tuutuuma gboo.
Ʊwalʊ ɖe ʊ sara gɩshɛbʊ ɖaa ɩ sim ma. Bacǝncǝrja ba cǝr gɩshɛbʊ gboo. Ʊwalʊ ɖe ʊ tɩ́ bon ɖaa bʊkɔŋkɔŋɔ̀ bʊnyɩʊ gɩshilikɔnɔ ma. Kaŋkǝm na samaa a ce atɩ jɩ ʊjɩʊ naa aye ram atǝn.
Aŋɔnka : BABABƆƉƖ SAALIFU Nuhum
[avatar user= »nouhoum » size= »original » align= »left » /]