Asiibi afɔ́nɔ̀ ‘aŋɔrɔ ariutaja ‘ʊshilé tǝb-na-kulumi kʊja, gaja ɩkotoku-banyɩʊ-na-tǝb-na-ganaana, na Nanjʊbɩ kasamaa a sǝ atǝn afaŋafaŋa na yɛɛ bampá kaŋyɩɩ kʊceu. Gʊsǝtǝna gʊɖe nɩ, bɛrɛ tuutuuma ba ɖoo ka na bʊtǝna bʊtǝna n’apá apá apɩ.
Ɩfaawɩɩ nɩ, mpá kalimaamʊ a sǝba ka acam ganɔ alǝ ʊwǝlǝsǝbaka. A nyiŋǝ ashee Togoo kaatǝna na kaɖi baja. Aŋkǝm na gʊpayarɩ a cam ʊwǝlǝ asala samaa aŋunii, anyiŋǝ aleheeri tuutuuma a shee bɛrɛ. Ʊwalʊ kaɖi baja ba cam ʊwǝlǝ ma, naa asala samaa nɖee a sǝ atǝn ma, na mbaɖee ba wʊɖa niya ʊpɩʊ naa kǝ ba tɩ sǝra apɩ na aɖʊ gaɖǝn laŋ ma. Ʊboŋu nɩ na ba walawala ɩnawɩya mbaɖee ba ɖa mpá nɩ ma, alǝ ashee samaa.
Bani baŋkǝm na Carashɩ kʊtǝnlajala kanɖiyar (Prefee) a cam ʊwǝlǝ ma, na wàà : Aɖe afaawɩɩ k’a lâma na. Bɛrɛ ba lǝ bʊlei tuutuuma a boŋo. Gasǝbaka, n’ʊyɔʊ k’ʊ ɖa na, gatǝna k’aa cê ŋyɩɩ na. Gatǝna, apá, akǝlǝ̀ n’ɩfala k’ɩ ɖâ fɛɛ na. Galaŋ bayà na bana ba lêe koŋkaarɩ aɖʊ bapi sukuru, ceu koo ba cêre atǝma. Ganyɩʊtaja, ba pâla bʊpisǝmpi na bapigii bɩbaawa baceka, bʊpisopi na bayifala baNanjiiriya kabʊfʊma bʊceka. Kaŋkǝm na a lǝ aboŋo na ma wàà, Bananjʊbɩja ba kɔ̂ɔ na laakaarɩ banɖǝma laŋ. Arɛ̀ aɖɔŋkɔnɔ k’a na jee nɖǝma na. Ba ta naa yɛ̂ɛ ba lêe akoɖǝn nɖǝma laŋ, ɩ sim ba yɛ̂ɛ bawor aman alee kabʊkɔ naa ʊrǝŋu na ma ʊ ɖâ.
Ŋkulo nɖee n ɖa na tǝŋǝtǝŋǝ gɩkrǝ anii ma, n ce gboo atɩ faŋa pɩ abɔ nɖee ba lee ma, n’atǝma nɖee ba na lee na shee gɩkrǝ kaŋyɩɩ kʊceu ma. Ʊwalʊ ɖe ʊ lee ʊsoŋsono páá.
Aŋɔnka : BABABƆƉƖ SAALIFU Nuhum
[avatar user= »nouhoum » size= »original » align= »left » /]