Ʊŋono Afo Sʊmaanʊ n’abasoro bʊjeɖu

Arɩsǝma afɔ́nɔ̀ ‘aŋɔrɔ ganaana kaja ‘ʊshilé tǝb kʊja gaja kotoku-banyɩʊ-na-tǝb-na-ganaana na ʊŋono Sʊmaanʊ a ɖʊ gʊnyɛ gafala ŋgaɖee SIL kaŋkulo Bashɩɖɩ n haya na nɩ, apra n’anii kaatǝnleeɖu gabʊmbɔnɔ ma, kabɔ laŋ.

Ʊŋono ɖe, a tɩ́ tɔɔ niya naa ashee agafala gaɖe kʊyalʊ́. A cee tǝm abasoro wàà, ba pɩ̂ atɩ shee laabaarʊ GʊGʊ kaɖi baja. Gaɖuɩ aɖi baja baɖe ba tɔɔ niya gboo ashee ʊshɩʊ ma na gǝŋ. Ʊshilé ɖe na bʊkaata bʊ ci na bawor. Gɩ boŋo na gɩ man ace atɩ jaŋ n’atǝbawor, ajɩ ʊjɩʊ.

K’ʊboŋu nɩ, naa gɩ ye ram atǝn na gɩ nyiŋǝ ashee atǝbawor, naa alǝ wàà, ɩ sim atǝgʊsoro gʊ tǝ̂wǝ na ce ɖaa ɩ cee ɖa ma. Gaja ga shêe atʊ sáà na ŋŋuro nlaŋlaŋa.

GʊGʊ kaŋkulo na gafalayar

Aŋɔnka : BABABƆƉƖ SAALIFU Nuhum

Nuhum BABA BƆƉƖ SAALIFU