Ɩtaabuloo bapɛmpɛŋɛka

Ŋkulo n ɖa ɩtaabuloo kakulu ɩrumoka nɩ
Ŋkulo n ɖa ɩtaabuloo kakulu ɩrumoka nɩ

Asiibi afɔnɔ ‘aŋɔrɔ tǝb-n’ɩnyɩʊ kaja ‘ʊshilé tǝb-n’ɩnan kʊja gaja kotoku-banyɩʊ-na-tǝb-n’ɩriu (12-14-2013) ʊ lee ka ʊshilé nɖee amʊ na Hakiimu gɩ pɩ SIL kaatǝnleeɖu ashee ɩtaabuloo mbaɖee laŋ gɩ na yɛɛ gɩ naa para GʊGʊ kabɔ ataMɛɛrii nɩ ma, kʊpɛmpɛŋʊ.

Ʊshilé ɖe, gɩ lee ntǝma njɩ gajaka na gɩteŋshile. Gɩ kpa gajaka ma, na gɩ ɖoo n’aboi nɖee laŋ gɩ na yɛɛ gɩ tǝ̂r ɩtaabuloo baɖe ma. Gɩ boŋo ma, na gɩ taa ɩtaabuloo baɖe atǝr aboi laŋ naa ari. N’atɩntǝma kanɖiyar Martɛɛŋ a rumo ɩnyine nɖee ɩ pâla ba sǝ̂ra na bǝlǝbǝlǝ ɩtaabuloo baɖe alaŋ naa naa para GʊGʊ kabɔ ma.

Gɩ boŋo gani ma, na gɩ fa pɩ asaʊ ɩnyɩʊ ɩŋunii apɛmpɛŋɛ naa aye cɔcɔ penti gʊsaʊ gʊɖǝn. Gɩteŋshile gɩ kpa ma, nsaʊ nsǝbaka nɖe n kʊ, na gɩ boŋo nsaʊ nnyɩʊtaja nɖee n saa ma, acɔcɔ. AtaMɛɛrii kǝbaja na bɛrɛ mbaɖee ba na ce Mɛɛrii nɩ ma, ba tǝ ba naa ŋǝ̂ GʊGʊ kabʊsaʊ na tʊr fɔɩ.

Malookiya IBRAHIM INUUSA

Laisser un commentaire