GʊGʊ kaŋkulo kakoŋkaarɩ

GʊGʊ kaŋkulo n ɖa koŋkaarɩ nɩ ashee atɩmbʊpa mbʊmbɔnɔ (bʊlinyaʊka na kɩmaana kambʊpa) gɩ na yɩɖa waa [dictionnaire] na gɩfɔnɔ ma. Atǝbaŋunii gɩ tɩ ɖa ntǝma nɩ alaamɩshɩ baa apaŋa na gajaka na gɩteŋshile ashee mbʊpa nɖe kantǝma laŋ. Aɖʊwaa gɩ tɩ yɛɛ waa baa gatǝna gapaŋa nɩ na anii kǝbapi ba ɖa, ba sǝ̂ra na ŋǝ na rǝŋǝ kpaarɩ. Laŋ na GʊGʊ kaŋkulo n ɖa koŋkaarɩ nɩ ashee ntǝma ɖe.

Bʊlinyaʊka na kɩmaana kambʊpa mbʊmbɔnɔ nleeka kafoto
Bʊlinyaʊka na kɩmaana kambʊpa mbʊmbɔnɔ nleeka kafoto

Baɩ na gɩ na lee ntǝma nɖe ? Gɩ na laa galei jɩ naa ashee kamààná, n’ʊkɛɛshɩɩ anii na gɩfɔnɔ kpaarɩ. Gɩ saŋ kɔɔ tɩ cam ʊtʊr ; gɩ ta cam aboŋo, atʊ gɩ tɩ pɛmpɛŋɛ na ɖʊ ntala ŋkǝka nɩ.

Ataniya na gǝŋ waa, basana mbaɖee ba pɩ̂ ʊwalʊ gakoloŋ ma, ba ŋǝ̂ koŋkaarɩ nɖee gɩ na lee na shee atɩgɩkrǝ kaŋyɩɩ kʊceu ma.

Ama gɩ tɩ yɛɛ [dictionnaire] kaŋyɩɖa n’atɩgɩkrǝ anii. Ŋyɩɖa nɖee atʊ gɩ shee ma na gǝŋ “bʊlinyaʊka na kɩmaana kambʊpa”. Ɩ ta wʊ̂ɖa gaɖǝn na yɛɛ ɩ lǝ̂ kanɖi laŋ, anyɩɩ kpa atǝgatǝnleeɖu kɩlaabaarʊ nɩ naa apala ŋgaɖee ɩ wʊɖa ma, ncǝn. Koo ɩ kǝ̂ gɩnyipi nɔmba nɖe laŋ: 66-66-11-11.

Malookiya IBRAHIM INUUSA

Laisser un commentaire