Anii kagɩkrǝ kaŋyɩɩ kʊceu kaŋkulo kʊwalʊ tǝb kʊja

Asiibi afɔnɔ ‘aŋɔrɔ tǝb-n’ʊɖǝn kaja ‘ʊshilé ʊnyɩʊtaja ʊ lee ka ʊshilé nɖee ŋkulo nɖee n na yɛɛ atɩgɩkrǝ anii kaŋyɩɩ kʊceu ma, n lee ʊwalʊ tǝb kʊja ma.

Ʊshilé ɖe gajaka, na gɩ wa asǝ atǝn atǝgatǝnleeɖu naa ayɛɛ ɖaa ɩ sim gɩ naa yɩ̂ɖa ɩkɔla afǝlǝfǝlǝ n’atɩgɩkrǝ ma. Atʊyɛʊ ɖe nɩ na baŋono ba shee ɩkɛɛshɩɩ nɖe : buruu na ba kɔɔ na yɩɖa waa bʊcicibɔto n’àtó ɩfɔlɩ ɖaa bʊkelencaŋato na bʊkɔfɛto ma…

Mbaɖee ba sǝra apɩ ʊwalʊ ŋkpala tǝb kanja ma, bafoto
Mbaɖee ba sǝra apɩ ʊwalʊ ŋkpala tǝb kanja ma, bafoto

Gani kaŋkǝm na gɩ lee ayɔkɔfɔlɩ ɩɖǝn. Ɩ kǝ gakɔŋkɔŋɔ gaɖǝn ma, na gɩ ɖoo ace tɩ jɩ ʊjɩʊ naa akɔɔ pɩ atɩ tǝwǝ.

Ʊjɩʊjɩka kaŋkǝm na gɩ fʊba bʊkɔ bʊfɔlɩ, bʊni bʊ gǝŋ waa, ayɔkɔ nɖee gɩ na yɩɖa n’ɩkrǝ ɩfɔlɩ k’ɩ lee atɩgɩkrǝ na ma. Ʊkɛɛshɩɩ : ɖaa nɖee gɩ na yɩɖa na ɩŋgilɩshɩ ma. Kɩɖǝn ɩ noo : kaafɩnta, geeti, sɔja, na nɖee ɩ saa ma…

Kʊshilé ɖe gboo atǝgatǝna Benɛɛ gaɖe ga wʊɖa bɔl na Burkina Fasoo. Ʊtonu mɩyaʊ ʊɖe mana. Ayɔkɔ ɩnyɩʊ ɖe, k’ɩ tɩ́ pala gɩ lee atɩntǝma acim sáà nɖee gɩ cee na ta ma na.

Malookiya IBRAHIM INUUSA

Laisser un commentaire