SIL Togoo na Benɛɛ kǝbaŋono bʊjeɖu

 

Atɩŋkulo na SIL Togoo na Benɛɛ kǝbaŋono
Atɩŋkulo na SIL Togoo na Benɛɛ kǝbaŋono

 

 

 

 

 

 

 

 

 

Gacalaɩ alaarba afɔnɔ ‘aŋɔrɔ anyɩʊtaja ‘ʊshilé ʊnʊntaja na SIL Togoo na Benɛɛ kʊŋono ba na yɩɖa waa HƖGƉƎN Lii [HIGDON Lee] ma, na nɖee a naa tɩ câm nɩ ma, ba na yɩɖa waa AYITE Bonafantiir [AYITE Bonaventure] ma, ba jeɖe Bashɩɖɩ kaSIL kaatǝnleeɖu. SIL kabʊtǝnleeɖu akoo-n’ɩnan nɩ ba jêɖe naa ʊŋono Lii a ye kɔɔ na gɩŋono ashee AYITE. Ba pɩ atǝgatǝnleeɖu atɩya ma, bʊjeɖu kulumi kʊja na gǝŋ, akoo-n’ɩnan ɖe nɩ.

Kʊshilé ɖe na ba wala atɩgɩkrǝ kamboi, baŋono GOMINA Abubakarɩ na ABUSKO ; kɔmin kɩkrǝ kʊŋono ABDULAƖ Naashɩrʊ na gʊpayarɩ ‘abɔŋɔnja ʊŋono Gɔmɔ.
Bafaawɩɩ nɩ na ba tɩ́ ri waa, atɩgɩkrǝ kabɔ ɩ ɖa nnyǝmǝ ma, ɩ sim baa aŋa a cere jɩ ayɔ kʊŋɔn na kʊtʊr. Galaŋ bayarɩ baŋunii ba lǝ waa, baɖe ba tǝ ba lêe kakoŋkaarɩ.

Kaŋkǝm na ba yɛɛ gʊfaŋa ŋgʊɖee ba sara na ma naa anii kʊceru ɖe ʊ lee gɩshɛbʊ ma.

Kaajɩkʊɖaka aŋɔrɔ ‘ʊshilé ʊkolontaja na atʊ SIL Bashɩɖɩ kaŋkulo gɩ wa na baŋono baɖe. HƖGƉƎN Lii na AYITE Bonafantiir bafaawɩɩ nɩ na ba taba atʊ bʊkɔɩ gɩ na faŋa na shee atɩgɩkrǝ kanɖi laŋ ma. Na baa aŋa a lǝ ŋgaɖee a wʊɖa ma ; ɖaa gɩ sɔlɔ gɩ ŋɔn atɩgɩkrǝ páá ma, ɖaa gɩ sɔlɔ maa ba naa faŋa jɩ sukuru mana nɩ ma, ba ta kɔɔ na yɛ̂ɛ ɩ sân n’atʊ ba ɖʊ̂ jɩ ɩnyipi nɩ.

Atʊlǝu nɩ, na ɖaa gɩ ɖa ŋkulo nɩ ma, ɩ pala ʊŋono Lii a laa na faŋa atʊ waa, ɩ san na baɖe páá aɖʊ koŋkaarɩ n’ʊsɔlʊ nɖee gɩ wʊɖa ashee atɩgɩkrǝ kanɖi laŋ ma. Baɖe ba tɩ kʊma atʊ naa naa yɛɛ gɩ kɔɔ lêe awu gǝŋ.    Gɩ tɩ shee pɩ gboo nsala naa naa nyiŋǝ Gaja ga tɩ̂ pɩ na babʊŋʊma alaafɩya.

Mʊstafa ISIFU SƱMAANƱ

 

Laisser un commentaire