Sulsbak kǝbaja bʊjeɖu

Atalaata afɔnɔ ‘aŋɔrɔ ariutaja ‘ʊshilé tǝb-na-ganaana kʊja na arɛ̀ n’akar ba na yɩɖa wàà, Hɛlmut na Iŋgriiɖ Hɛnɩŋ Sulsbak kǝbaja pɩ gǝŋ, ba jeɖe atʊ SIL kaatǝnleeɖu naa akʊɖa ɖaa gatǝna nɩ katoncʊnʊ kabaamʊ ɩ na sara ma. Gʊna Iŋgriiɖ a lee Afaraŋshɩja na, naa naa faŋa gɩjaamakrǝ Gafaraŋshɩtǝna nɩ ; gʊyà a ta lee Ajaamaja naa alee bʊtǝna nɩ kamaana balaaka kayɔka.

Hɛlmut na Iŋgriiɖ na SIL kaŋkulo
Hɛlmut na Iŋgriiɖ na SIL kaŋkulo

 

 

 

 

 

 

 

 

 

 

Naa ɩ pàá ɖa atʊ biti na, na ba kʊɖa ashee atʊ wàà, gatǝna nɩ katoncʊnʊ ɖe ɩ na ɖoo na ayo kʊbuu gatǝna nɩ na, ɖaa gatǝna ga na tɩ tar acǝpra ayo afum ɖaa bʊja bʊkuli gʊyá ma. Kʊkou ʊ sɔm sɔm páá, laalaa ŋkǝlǝ́ɩ ɩmaashɩn kǝ ba kana ɖa na ma.

Bafaawɩɩ nɩ, ba faŋa atʊ ɩfoto n’ɩfilim mbaɖee ba na laa na faŋa wàà, galeiɩ baɖe ba na lǝ ma, ga lee ɩja nɩ ma. Ba lǝ wàà, akulu ɩloŋka nɩ ba na ko naa aye na wakrǝ ncǝn na laa atoncʊnʊ ɖe, aɖʊwaa k’ɩ ɖa alaŋlaŋ ɖaa Sautafrɩka kaatǝna nɩ ma na.

Atoncʊnʊ ɖe, bʊkɔɩ ba na lee na ma ma na gǝŋ : ba tɩ sʊɖa n’aku ʊnyǝŋkrǝ kasáà, ba tɩ lo ɩ na kal n’ʊtonu kɩfǝtǝla mpá nɩ. Ba tɩ tɔɔ kɩtalʊ ɖǝn na pɛmpɛŋɛ n’ɩpeli. Atoncʊnʊ ɖe nɩ ba na lo isin baɖǝn nɩ na ŋaŋa n’arukɔ.

Atoncʊnʊ ɖe ɩ jee mpá nɖe kǝbɛrɛ bʊɖaʊ fɛɛ ŋkǝŋ. Ama baamaakɔ k’ɩ kɔɔ na sara atoncʊnʊ ɖe kaaɖulaala gɩshɛbʊ na ma, naa ba riŋ gaɖu gaɖe ma, baɖǝn ba tǝbǝ mpá.

Mʊstafa ISIFU SƱMAANƱ

Laisser un commentaire