Anii kǝbaja bʊwalʊ Kʊtɔnʊ nɩ

Gacalaɩ alahaɖɩ aŋɔrɔ anʊntaja ‘ʊshilé ʊnantaja, atʊ TSASKƐ Martɛɛŋ n’akar Stɛfani gɩ ce atɩ jeɖe Anii kǝbaja bʊwalʊ nɩ Kʊtɔnʊ. Ʊŋono BASAKPAƖ Suhailu na bɛrɛ baŋunii ba cam atʊ gɩshɛbʊ.

Ʊŋono Suhailu, baŋkulo kanɖiyar, afaawɩɩ nɩ a sǝba na lige bɛrɛ baŋunii bʊwalʊ ʊkǝŋja kɩfaawɩɩ. Kaŋkǝm a tam ɖaa ʊwalʊ Arɖabs [ARDBAs] kǝbaŋono ba yɩɖa ɩkaracɩ Bashɩɖɩ aŋɔrɔ anantaja ‘ʊshilé akoo kʊja, ʊ sara ma.

2014_05_09_SZ_Reunion_Cotonou
Anii kabɔ Kʊtɔnʊ kʊwalʊ nɩ

Gani kaŋkǝm a shee atʊ ʊwǝlǝ, na gɩ tam ɖaa anii kagɩkrǝ gɩ ce ŋyɩɩ ma. Gɩ faŋa bɛrɛ ɖaa anii kʊŋɔn ʊ ce ŋyɩɩ ma, na gɩ faŋa pɩ bʊlinyaʊka na kɩmaana kambʊpa ba na yɩɖa gɩfɔnɔ nɩ wàà, [dictionnaire] ma. Gɩ faŋa pɩ abʊpa ɩŋunii nɖee gɩ lee n’atɩgɩkrǝ gboo ma, na gɩ faŋa ataGʊGʊ kabɔ ɩŋunii naa atʊr mbʊsaʊ nɖǝn na pɩ. Atʊwǝlǝ kʊboŋu nɩ, gɩ taba bɛrɛ baŋunii ba lêe koŋkaarɩ acere anii kʊŋɔn gɩshɛbʊ naa ashɩ abʊpa nɖee atɩŋkulo n ɖoo na ma boŋo ma, naa ɩ naa shee anii kaŋkulo n ɖa Bashɩɖɩ ma, ɩkashɩ.

Kaŋkǝm ba tǝwǝ na kpeɖe acǝma kʊwalʊ ba na yɛɛ ba lêe ɩŋɔrɔ bafɔlɩ nɩ ma.

Ʊwalʊ kʊboŋu nɩ ɩ san n’atʊ ɖaa bɛrɛ tuutuuma ba kiɖe naa ashɩ anii kabʊpa tuutuuma ma. Gɩ tɩ sala pɩ wàà, Gaja ga shêe laaɖa ma ! Na gʊbʊtʊrka ma !

Stɛfani TSASKƐ

Laisser un commentaire