Ʊyɛʊ kaŋkulo kʊwalʊ tǝb-n’ɩriu kʊja

Asiibi afɔnɔ ‘aŋɔrɔ anantaja ‘ʊshilé ʊnʊntaja na ʊyɛʊ kaŋkulo n lee kʊwalʊ tǝb-n’ɩriu kʊja. Ʊshilé ɖe, naɩ naa gɩ ye sǝba ʊwalʊ ɖe, gɩ tɔɔ ɖaa anaŋa ɩtʊrka ma akʊɖa ɖaa Bashɩɖɩ a lee ajɩ gatǝna na bʊpapiri bʊɖǝn ma. Gɩ boŋo ganɩ ma, na gɩ yɛɛ ayɔkɔkaraka kayɩɖa ɩŋunii, ɖaa: toko, cogoto, ɖaramaasʊ, na nɖee ɩ saa ma…

Ganɩ kaŋkǝm na gɩ yɛɛ akalɩ nɖee ɩ na kʊn ayɔkɔkaraka ɖe ma, ɩni nɩ gǝŋ: kara, foɖo, laa, siu, tine, kan…

Gɩ boŋo ganɩ ma na gɩ ce atɩ jɩ ʊjʊ n’aŋʊra cei naa ye tǝwǝ.

Atʊyɛʊ nɩ, gɩ wʊɖa bʊlipi bʊɖǝn bʊ na lee atʊ nawɩya ma, na gɩ pɩ na bʊ ʊwalʊ ɖe nɩ, na baŋono ba kaŋa n’atʊ ayɛɛ kɩmàána. Bʊlei bʊɖe bʊ gǝŋ: ganampɩɖɩ [pointe des orteils], gacǝnsǝwǝ [diaphragme], na mmaŋkʊra [noeud des fesses], ŋkǝrǝ, àtó [babouin], àtò [eaux,couleur], àtó [arbre] na bʊlifɔlɩ bʊɖǝn acǝŋǝ…

Ʊyɛʊ kaŋkulo n ɖa ʊyɛʊ nɩ
Ʊyɛʊ kaŋkulo n ɖa ʊyɛʊ nɩ

Ʊyɛʊ ɖe nɩ na gɩ pɩ n’atʊsoro Nuhum ambʊpa njala a na ŋɔɔn ma, «apilepile kayɔkɔ».
Bʊkɔɩ gɩ yɛɛ ncǝn ma na gǝŋ: lɔɔrɩ bɛn koo nfurukɔ kalɔɔrɩ [ben], faŋ miliki kakɛkɛ [vélo de familk]…

Ɩ kǝ bʊkɔŋkɔ bʊnan-na-gʊsaʊ ma, na gɩ boŋo ʊwalʊ ɖe, na baaŋana a kɔɔ shɛʊ agaɖu.

Malookiya IBRAHIM INUUSA

Laisser un commentaire