Gayofosɔkɩmɩ kɩpi ɩbutuka

Atɩŋkulo kakoŋkaarɩ k’a lal n’atɩgɩkrǝ anii kaŋyɩɩ kʊceu kanɖǝnɖǝn na. Gɩ tɩ lee ɩkoŋkaarɩ baɖǝn na shee atakɔmin Bashɩɖɩ kaŋyɩɩ kʊceu gboo. Gaja 2014 kaŋɔrɔ anantaja nɖe nɩ, gɩ sǝba na butu gayofosɔkɩmɩ [moringa] kɩpi na yɛɛ gɩ kâŋa na kɔmin kasamaa aŋunii. Ɖaa gɩ sǝba ʊbutu ɖe wáá ma, gɩ ta ŋǝ̂ wàà ɩ tɩ sara gɩshɛbʊ, arɛ̀ a ta kim asǝla n’atʊ, gɩ tɩɩ fâŋa nɩ kʊyɔʊ. Aɖʊwaa gɩ ŋǝ wàà, kɔmin nɩ bɛrɛ tuutuuma ba tɩ yɛɛ.

Gayofosɔkɩmɩ kɩpi gɩ butu ma, ɩ tɩ ta
Gayofosɔkɩmɩ kɩpi gɩ butu ma, ɩ tɩ ta

Gayofosɔkɩmɩ ga wʊɖa ɩfitamin tuutuuma, mbaɖee arɛ̀ a ta naa jɩ̂ kabɔ, alaafɩya a na pɩ gɩshɛbʊ na shee nɩ ma. Arɛ̀ baa apaŋa a ta wʊ̂ɖa kayo agafala nɩ, aɖe n’abʊŋʊma ba tǝ ba naa lô kabɔ na shee balaafɩya.

Hakiimu ATI KALAM

Laisser un commentaire